Editoryal: Illegal logging

BISAN sa nasinating mga dagkong kalamidad sa kalibutan, ilabi na gayud dinhi sa nasud, tungod sa pagkahurot sa atong mga kakahuyan ug kabukiran, duna pa gayud diay daghan nga nalambigit sa illegal logging.

Moabot ngadto sa 20 ka mga bansohan o sawmills sa Agusan del Norte ug Agusan del Sur ang gipasira sa Department of Environment and Natural Resources (DENR-Caraga) sa gihimong anti-illegal logging operations sa rehiyon.

Sumala pa nga nagmalampuson ang unang first wave sa operasyon sa DENR ilabi na nga apil sa ilang gipasira ang usa ka furniture shop sa Butuan City nga duna pay stocks sa mga illegal cut logs.

Samtang padayon pang gi-consolidate sa ilang operation units ang kinatibuk-ang volumes sa nasakmit nga mga cut logs gikan sa kapin 100 ka mga sawmills ug planta nga ilang gisurprisa nga gi-inspeksiyon.

Ang illegal logging dugay na kaayong problema sa nasud. Gani tungod niini, gawas sa mga bukid nga naopaw na, daghan na sab nga kinabuhi ang nakalas gumikan sa mga flash floods ug landslide kay wa na may mogunit sa mga tubig ug yuta gikan sa kabukiran.

Ingon niini ka-importante ang kahoy sa kinabuhi sa tawo busa angay lang unta natong proteksiyonan ang atong kalasangan, taliwala sa kamatuoran nga hapit na kining maopaw tungod sa pagpasagad sa uban natong mga kaigsuonan.

Angay nga tinud-on sa gobyerno ang pagpakigbatok sa illegal logging kay di pa man tingali uwahi ang tanan.

Tataw kaayo nga kon tinud-on lang sa gobyerno ang paggukod niining ilegal nga tigpamutol og kahoy sa kabukiran, tingali makunhoran og diyutay ang mga pagbaha ug mga landslide, ilabi na gayud og dunay masampolan nga mapriso.