Dura: Hinaut nga makat-on

DAW nakasabot na si Presidente Rodrigo Duterte nga kinahanglan nga ipaubos na ang National Food Authority (NFA) sa superbisyon sa Department of Agriculture (DA) mao nga iya kining gimando kagahapon.

Subay sa pahayag ni Presidential Spokesperson Harry Roque Jr., ang desisyon gihimo human nakigtagbo ang Pangulo sa NFA Council.

"The NFA, the Philippine Coconut Authority (PCA), and the Fertilizer and Pesticides Authority (FPA) will be made attached agencies of the Department of Agriculture," suma ni Roque.

Kahinumdoman, niadtong Mayo 2014, si kanhi Presidente Benigno Aquino III nipirma sa Executive Order 165, nag-awtorisa sa pagbalhin sa NFA, PCA, FPA, ug National Irrigation Administration ngadto sa Office of the President.

Kini nga desisyon miguwa human gikataho nga ubos ang suplay sa bugas nga gisubsidiya sa gobyerno.

Atol sa gihimo nga meeting niadtong Lunes, ang Pangulo miaproba sa 250,000 metriko toneladang nga bugas pinaagi sa government-to-government scheme aron mahulipan ang nahurot na nga NFA rice.

"Imported rice is set to arrive soon," suma sa opisyal nga midugang: "Subsequent importation is to be done by government to private or auction and importation will be implemented or supervised by the Executive Council Committee headed by the Office of the President."

Giklaro hinuon nga wa giabolis sa Pangulo ang NFA Council, bisan dunay suliran sa pagdumala sa ahensya.

Ning maong katikaran, mas mapadali unya ang paghatag alibyo sa suliran sa suplay sa NFA rice.

Nganong nagkuwang ang suplay sa bugas? Suma pa sa akong nahinabi nga opisyal sa NFA, wa sila nakaangkat og bugas sa laing nasud tungod kay nagmagahi ang NFA Council sa miaging tuig.

Katarungan sa NFA Council nga magdaginot ang gobyerno pinaagi sa di pag-angkat og bugas sanglit ang moangkat niini mao ang pribadong negusyante.

Gipasiatab pa sa NFA Council nga way nagasto nga usa ka sentimo ang gobyerno kay di ang ahensya ang direktang nangangkat og bugas. Apan unsa may nahitabo, di ba nahurot ang suplay sa NFA rice?

Gani, dinhi sa rehiyon onse wa nay NFA rice sukad niadtong Marso ning tuiga. Wa nay mapalit ang sama nako nga anak sa pobre uyamot.

Nasabtan nako ang pamunoan sa NFA Council labot sa pagdaginot. Apan ang alaot niini mao ang mga kabus nga nag-antus sa mahal nga bugas sa merkado.

Mao gayud kini ang resulta kung di gayud paminawon ang tingog sa uban nga mas nakakita sa epekto sa ilang mga desisyon.

Hinaut nga ang nahitabo mapanaminan sa mga opisyal sa Department of Agriculture aron di mag-antus ang mga kabus.