Genoguin: Missent

Al Genoguin

ANG liga sa mga mayores sa Davao del Sur nagpadala og hiniusang katuyoan ngadto sa Department of Interior and Local Government (DILG) nga mugnaon na ang ikaduhang Congressional district sa probinsiya sa Davao del Sur.

Ang tibuok probinsiya sa Davao del Sur sa wala pa kini mabahin sa duha ka probinsiya, naglangkob sa 14 ka lungsod ug usa ka siyudad nga mao ang Digos City.

Sa dihang gibahin na ngadto sa duha ka probinsiya, upat nalang ka lungsod ang nasakop sa Davao Occidental nga mao ang Malita nga capital town, ug tulo lang ka lungsod ang nsakop niini nga mao ang Don Marcelino,Jose Abad Santos ug Saranggani.

Base sa rekord nga atong nahibaw-an, kwalipikado na ang Davao del Sur nga mabutangan og ikaduhang distrito, tungod kay dos siyentos singkwenta mil lang ang gidaghanon sa iyang molupyo ang gikinahanglan ug dunay income nga dili mominus sa P200,000,000.00 mao nga kwalipikado na kini sa iyang second Congressional district.

Pero “missent” ang mga liga sa mga mayores sa siyam ka lungsod tungod kay walay katungod ang DILG nga maoy mopasa og balaodnon didto sa Kongreso aron magmugna og ikaduhang distrito ang maong probinsiya, kundi katungod kini sa kongresista nga maoy naglingkod sa probinsiya ug kini mao si Rep. Didi Cagas.

Sama sa pagmugna sa Digos nga mahimong siyudad, si Rep. Douglas “Dodo” Cagas maoy bugtong kongresista nga nagpasa og balaodnon didto sa Kongreso, ug sa dihang namatikdan nga kwalipikado na kini sa tanang mga rekisitos, nahimo nang dakbayan mga 18 ka tuig na ang milabay.

So, paghulat mo sa pagbuot sa inyong kongresista, ayaw mo pagbuot-buot.

Magpaka-disente pod?

Sukad-masukad, karon pako makadungog og dili desiyenteng pinulongan gikan sa usa ka tawo nga nagkupot og dili basta-bastang posisyon sa Kongreso, ang pagka- Speaker.

Proyekto lang daw nga natahap nga nanghilabot ang gobernador, gibaharan daw na sa Speaker nga “basig matamparosan nako siya.”

Suma pa, gisulti kini niya atubangan sa mga sakop sa media
sa maong probinsiya.

Tingali para kanato, bisan kontra partido pa niya ang gobernador, dili angay magbuhi og pulong ang giisip nga ikatulo ka tawo nga nagkupot og taas nga posisyon sa atong nasud.

Pagpaka-desiyente pod, Sir? Kaniato ordinayo ka lang, halos gani walay mopansin nimo kon asa ka masuok, pero karon, dili ka na basta-basta.

Adunay pinulongan nga sagad natong mabati gikan sa atong mga katigulangan nga nagkanayon:

“Kon gusto ka respetohan, unaha pagrespeto ang imong kaugalingon.” Nobody stays in power forever, and it will come to and end. Pag-abot nato nianang panahona, ikahinagbo ra gihapon nato kadtong mga tawo nga atong giminusan ug gibiay-biay, ang pangutana makatutok paba kaha ta’g tan-aw niya labi na’g nagpabilin siya sa gahum ug kita patid-patid nalang og lata?

Aayaw i-abuso ang temporaryong gahum nga anaa kanimo karon kay dili kini pagpabilin kanimo hangtud sa hangtud kay temporary lang kini, kuhaon ra kini kanimo inig abot na sa hustong panahon, di ba, sir?