Dels Reyes: Katawhan nakutaw sa panghitabo

Seth delos Reyes

NALIBOG ang katawhan sa dagan sa mga panghitabo sa nasud karon, labi na sa pag-absuwelto sa Department of Justice sa mga inila nga mga nagpaluyo sa pagpayuhot sa ilegal nga druga sa nasud nga sila ni Peter Lim, Peter Co, Kerwin Espinosa ug 20 pa ka mga tawo.

Nagkadaiya ang panan-aw sa katawhan kay daw nagkaguliyang na ang pagdumala sa kagamhanan ni Presidente Rodrigo Duterte kinsa makita sa daghang higayon nga nagpangagot kon mahisgutan na ang ilegal nga druga tungod nahimo kini nga ugat sa nagkadaiyang krimen nga nahitabo sa nasud.

Nadawat sa katawhan nga daghang gitumba tungod sa kampanya kontra illegal drugs apan karon daghan ang nakapangutana ngano nga ang mga dagko nga mga drug lord nga mismo miangkon sa ilang pagkalambigit pagpayuhot sa illegal drugs sa nasud, absuwelto man hinuon kay kulang ang ebidensiya nga gihatag sa mga saksi sa gipasaka nga kaso.

Daw nagkaguliyang ang gobyerno sa panglantaw sa uban tungod ang mga giabsuwelto nga miangkon sa ilang kalambigitan sa illegal drugs nahimong saksi sa kaso ug pagkabilanggo ni Senador Leila Delima tungod kay ang ilang kita gikan sa gibaligya nga mga shabu gihatag kang de Lima sa iyang pagpangampanya pagka-senador sa nasud.

Unsa man diay ang gipangita nga ebidensiya ni Secretary Vitaliano Aguirre II aron makonbikto ang mga akusado? Unsa ba gyud katinuod ang kampanya ni Duterte sa pagsumpo sa illegal drugs sa nasud?

Daw dili kontento ang katawhan sa iyang giingon kang Aguirre nga siyay maoy iyang ipuli kon ugaling makaikyas kining mga auksado nga karon giabsuwelto.

Sa laing bahin, dunay mga pundok nga mitumaw ug naggalgal kang Secretary Lawrence "Bong" Go nga padaganon pagka-senador sa umaabot nga eleksiyon. Alang kang Go wala sa iyang handom nga mahimong usa ka inila nga politiko kay ang iya lang nga naa siya kanunay nagapaluyo kang Presidente Duterte.

Gani man iyang gisalig kang Pangulong Digong unsa ang mahimong iyang kaugmaon kon itugpo ba siya ug paapilon sa bugnong lugaynon sa umaabot nga panahon.

Nakapamulong sab si Go nga mas mosuporta ug mas pabor siya nga si Mayor Sara Duterte ang mokandidato kay sa iyang panglantaw mas takus kini ugaling mahimong miyembro sa Senado.

Daw dili pa klaro unsa gyud ang lakang sa pamilyang Duterte sa natad sa politika apan dunay mga panglantaw nga sinugdanan na kini sa pagpaila sa mga katawhan nga posibleng maapil sa linya sa mga kandidato sa umaabot nga eleksiyon.

Sa kasamtangan, busy pa si Mayor Sara sa pag-atiman sa mga programa sa pagsaulog sa 81st Araw ng Dabaw. Bugtong si Cong. Karlo Alexei Nograles pa lang ang taga dakbayan sa Davao ang mipadayag nga gustong modagan pagka-senador sa umaabot nga eleksiyon.