Editoryal: Subling masibog

MAPURNADA ang gihimong pagpangandam sa Commission on Elections (Comelec) alang sa Barangay ug Sangguniang Kabataan (SK) elections sa Mayo 14.
Kini human nga milusot ang balaudnon sa House committee on suffrage and electoral reforms nga nagtumong sa subling pag-oktaba sa pagpahigayon sa eleksiyon.

Sumala kang Comelec Dir. Teofisto Elnas, naa na unta sa 80% nga kaandam sa poll body alang sa nahisgutang eleksiyon.

Gani, andam na ang halos tanang balota ug election returns samtang nakasugod na sab sila nga motunol og mga non-accountable forms.
Gawas niini, naa na sumala pay memorandum of agreement ang Comelec sa Development Bank of the Philippines (DBP) alang sa pagbayad sa mga molangkob sa electoral boards.

Bisan gani ang security preparations sa eleksiyon nakaandam na.
Apan tungod sa gipasar nga balaudnon, diin 17 sa mga miyembro sa komite mipabor sa ikaduhang Lunes na lang sa bulan sa Oktubre ning tuiga himuon ang nahisgutang eleksiyon inay sa Mayo 14, 2018, posibleng mapurnada ang pagpangandam sa Comelec.

Sumala sa tsirman sa komite nga si CIBAC Party-list Rep. Sherwin Tugna nga tumong sa pag-oktaba aron nga idungan na lang kini sa plebesito sa Charter Change sa nahisgutang bulan.

Pipila sa mga nagtinguha nga modagan, nadismaya sa maong lakang, ilabi na nga gipamahayag sa liderato sa Senado sa milabay nga mga semana nga walay bug-at nga hinungdan aron nga di madayon ang eleksiyon sa Mayo.

Samtang duna say pipila ka mga kongresista misupak sa balaudnon nga subling isibog ang eleksiyon.

Kon ugaling madayon ang postponement, kini na ang ikatulong higayon nga maoktaba ang eleksiyon ug naa sa ikalima ka tuig na ang paglingkod sa mga kasamtangang barangay opisyal.