Roldan: Uyon ka sa diborsyo?

Emmanuel C. Roldan

DUGAY nang kampanya sa women's rights advocates ang pagpasar og balaod sa diborsyo. Legal kini nga paagi sa pagputol sa kasal o panag-uban sa magtiayon nga wa na magkasinabot.

Karong bag-o medyo nikusog ang kampanya sa dihang nipasar na sa komitiba sa Kongreso ang Legal Divorce Bill.

Hinuon wa pay kisaw sa Senado kung mopasar kini tungod kay pipila ka senador ang di gyud gusto nga molusot ang maong balaudnon samtang naglingkod pa sila.

Kung di sayop ang balita, ang Pilipinas og Vatican na lamang ang mga nasud nga wa tugti ang diborsyo.

Ang baruganan sa simbahang Romano Katoliko kaniadto ug karon nagpabilin pa gihapon nga sakramento ang kaminyuon nga dili mabungkag sa tawo.
Sagrado kini nga panag-uban sa duha ka binuhat—lalaki ug babaye nga ang nag-unang misyon mao ang pagpadaghan sa kaliwatan ug pag-atiman sa butang nga ginama sa Diyos sa kalibutan.

Apan bisan tuod gidili kini sa simbahan, puwede nga mabawaliwala ang kasal nga daw walay kasal sa paagi nga "canonical annulment" nga medyo lisud ug dugay nga proseso.

Sa laing bahin, kasamtangang gitugtan sa atong balaod ang "legal separation" o magbulag sa pinuy-anan ug higdaanan ang magtiayon apan dili sila puwedeng magpakasal sa uban.

Kung madakpan nga nilapas ang lalaki puwedeng pasakaan og kaso nga "concubinage" samtang ang nilapas nga babaye puwedeng kasohan og "adultery."

Kadtong interesado nga maputol ang ilang kasal puwedeng mopailawom sa "annulment proceedings" nga dugay ug gasto kaayo. Niabot og sobra tulo ka tuig ang pagpa-annul sa akong higala nga si Venus sa iyang bana.

Gawas sa legal nga proseso, kinahanglang ipakita nga dunay "psychological problem" nganong kinahanglan silang magbulag.

Di pod sayon ang giagian sa atong kanhi mayor ug Presidente karon nga si Rody Duterte sa pagpa-annul sa ilang kasal ni Madam Elizabeth Zimmerman.
Ang usa nako ka paryente nakigpa-annul sa iyang asawa nga tua sa America. Sobra lima ka tuig na kining nagtrabaho isip nurse apan nakakita'g laing bathala nga iyang gipakaslan.

Ila untang plano nga kung makapundar na ang babaye sa America mosunod sila ug didto na manimuyo kauban sa upat nila ka anak. Di pod lalim ang proseso nga ilang giagian ug hastang dakoa sa gasto.

Para kanako dili dapat mosangko sa panagbulag ang panag-uban sa magtiayon. Personal kini nga saad atubangan sa Diyos ug awtoridad nga magpabiling kusgan ang gugma ug panaghiusa sa matag usa aron matuman ang misyon sa ilang panag-uban.

Apan mituo usab ako nga may panahon nga bisan unsay buhaton di na gayud mosalir ang relasyon.

Pangutana pa sa akong silingan nga babaye nga pabor sa diborsyo nga nganong magpabilin kita sa pagpuyo kung impiyerno na ang panag-uban?

Sumala niya nga bugbog-sirado siya sa iyang banang palahubog nga trabahante sa konstruksyon kung masipyat siya o dili magpadulog inig kagabii.

May panahon nga gibuboan og kerosene ug gihan-ang sunugon ang ilang balay human sa grabeng paglalis. Usa ako nga mosuporta sa balaod nga "legal divorce" isip katapusang paagi sa pagsalbar sa kinabuhi ug katungod sa hingtungdan.