Way hustisya

SUNOD-SUNOD na ang natigayong pagpamatay sa Tagum City nga nakaalarma sa katawhan.

Sa miaging semana, gipamusil ang duha ka mga lalaki, nasundan kini og usa ka sundalo, dayon kagahapon gipusil-patay sab ang usa ka giingong negusyante og alahas.

Kung kapulisan ang panguntan-on unsay motibo sa krimen, sila motubag nga wa pa nila masuta ug padayon ang ilang imbestigasyon.

Apan malubong nalang ang biktima gikan sa siyam ka adlaw nga haya, wala pa gihapoy resulta sa giingong imbestigasyon nga gihimo sa kapulisan.

Di lamang kini sa Tagum City nahitabo, apan kini ang sagad nga kamatuoran diha sa imbestigasyon sa kapulisan sa bisan asang dapit sa Pilipinas.

Pero ang pipila nagtuo nga dunay dautang binuhatan ang gipamatay labi na kadtong mga nakaila gayud sa biktima.

Ang salikwaot lamang niini ug gikaalarma sa katawhan mao nga basin unya maanggidan lamang ug mapatay sa mga mamumuno ang inosente nga tawo. Kini ang pait kung mahitabo.

Kung di man mailhan ang mamumuno ug di man makab-ot ang hustisya ngadto sa mga kabanay, mabutang nalang ba kaha kining tanan nga kabahin sa daw di na bag-o nga isyu sa summary killings ug extra-judicial killings sa nasud?

Kung kini ang tinuod nga kamatuoran, nan, wa nay mahimo ang katawhan kay giingon nang daan nga wala gyu'y lugar ang mga kriminal sa nasud.

Manghinaut nalang kita nga di gyud unta maalaan ang mga inosente kay naa sab na silay mga pamilya nga magbangutan.