Delos Reyes: Usahay naa, usahay wa

Seth delos Reyes

MGA ahensiya sa gobyerno didto sa kaulohan nanakop sa mga batang layaw tungod sa mga panghitabo nga duna nay nangamatay nga way labot sa ilang pagpunay og rayot.

Usa kuno kini ka programa sa gobyerno nga nagpakabana alang sa kaayohan sa mga kabataan aron mahimong luwas o safety kon tapukon kaysa didto ra sila sa gawas.

Mga ginikanan sa mga gipangsikop nga mga bata nagyawyaw kay wa mahimutang sa gibuhat sa gobyerno kay nakahasol sa ilang pagpanginabuhi pagpaninda diha sa kadalanan. Gobyerno na hinuon ang sad-an sa pagsikop sa ilang mga anak nga gipasagdan nga makahasol sa uban.

Tungod sa pagkonsente sa mga ginikanan magdagsa ang mga kabataan kay duna may molaban. Posible nga sa ilang pagdako sila ang mopuli sa mga nangatigbak nga mga tigbuhat og salaud sa katawhan kay unsa man ang ilang matun-an sa ilang pagkalatagaw?

Sa ilang pagkuyog-kuyog sa susama nila og kahimtang, daghang krimen ang ilang matun-an. Gani man wa na silay mga respeto sa mga awtoridad kay nagsalig nga bisan sila pangdakpon ug i-detiner, buhian ra man gihapon sila tungod sa balaod nga nagapabilin nga dili sila angay mag-atubang o pasakahan og kaso kay mga menor de edad lagi.

Ugaling dunay makita nga mga pangus sa ilang kalawasan panahon nga sila gisikop, mameligro na hinuon ang mga awtoridad nga maoy makasouhan ug matanggal sa ilang trabaho kay gilapas ang balaod nga nagpanalipod sa mga kabataan.

Maayo man unta ang tumong sa mga ginikanan nga motrabaho apan duna sab silay tulubagon sa pagpasagad sa ilang kabataan kay dili nila mabantayan. Kon mabanggaan sa mga sakyanan diha sa kadalanan isog ra ba kaayo nga motulisok sa mga drayber. Sa mga drayber nga mabiktima ug maangin walay mahimo kay bisan naa sa sakto nga lugar ang ginadaganan sa ilang sakyanan dakpon gihapon ug mag-atubang sa kaso sa danyos nga nahimo.

Atong mahinumdoman nga duha ka mga sakop sa pulis sa dakbayan sa Davao ang giimbestigahan sa Davao City Police Office tungod sa ilang pagbunal sa mga bata nga ilang nadakpan nga naglatagaw bisan lawom na ang kagabhion.

Kon matinud-anon pa lang ang mga ahensiya sa gobyerno sa ilang pagpatuman sa balaod aron maproteksiyonan ang mga kabataan, hagiton ta mo nga ipatuman kini sa tanang panahon dili kon kanus-a lang mo ganahan.

Dunay mga kabataan nga ginapanghimuslan ang ilang pagkabatan-on sa pagpatrabaho kanila sa mga konstruksiyon.

Dunay akong nakita nga maglugos pa og sakwat sa maso aron ibunal sa kabilya kay nahimong trabahante sa kontruksiyon sa kadalanan. Daghan pang uban apan wa lang makita apan tataw nga paglapas sa katungod sa kabataan.