Genoguin: Helicopter deal

Al Genoguin

PLANO sa Duterte administration nga mopalit og 16 ka helicopter gikan sa Canada. Gani, andam na ang $233 million (P12 billion) para sa maong katuyoan, pero gikansela kini sa atong Presidente tungod sa naghinobra nga pagkahilabtanon sa Canada kon unsaon nato pagamit ang helicopter.

Gipa-review ni Prime Minister Justine Trudeau kon asa daw gamiton ang 16 ka Bell-412EPI utility helicopter nga paliton sa atong nasud kay dili kuno siya gusto nga baligyaan ang Pilipinas sa helicopter kon gamiton sa pagpatay sa atong kadugo nga Pilipino.

Tungod tingali kay tunog kaayo ang pangalan sa atong presidente nga pa-imbestigahan sa International Criminal Court (ICC) labot crime against humanity nga gi-file sa ICC batok sa atong presidente krimen nga dunay kalambigitan sa kampanya sa batok sa ginadili nga druga, dili rebilyon ug terorista.

Pero lahi? Matud pa ni Prime Minister Justine Trudeau, “The Canadian government would not allow Bell to sell the helicopter to Manila if these where to be used by soldiers to kill other Filipinos.”

“Trudeau’s government feared that the helicopter would be used in security operations against communist rebels and Moro terrorist.”

Hinungog man ni nga statement gikan sa usa ka leader sa nasud. Ang buot ba ipasabot ni Prime Minister Trudeau nga bisan kon adunay rebelyon ang iyang nasud nga gustong pabagsakon ang iyang gobyerno, dili niya gamiton ang pwersa militar aron panalipdan ang iyang estado?

Pinaagi niini, gimandoan sa atong presidente ang armdong kusog sa atong nasud nga i-kansela ang deal ug mangita og laing kapalitan og mga helicopter nga dili manghilabot kon unsaon nato pagamit.

Davao del Sur

Sa milabay nga semana, atol sa kasaulogan sa National Economic Development Authority (Neda), nalibkas sa baba ni Presidente Duterte nga padaganon niya og governor sa umaabot nga 2019 lokal and natonal election si PNP Director General Ronald “Bato” Dela Rosa.

Abi nako og ikabalaka kini ni Governor Douglas “Dodo” Cagas, pero sa atong nabati, mo-giveway daw siya in favor of General Dela Rosa.

May mga higayon nga madungog nako gikan mismo sa baba ni Governor Dodo Cagas nga gikapoy na siya, mao nga suportahan niya kon ugaling man madayon nga modagan sa pagka-gobernador si General Dela Rosa, way problema kay kauban sila og partido.

Ang pangutana, mopahulay na kaha si Governor Dodo Cagas sa politika? Dili pa kay plano niini nga mag-Mayor sa dakbayan sa Digos, sayud kitang tanan nga si Governor Dodo Cagas mao ang responsableng tawo nga nagmugna aron mahimong siyudad ang Digos.

Tingali bag-o siya mopahulay sa natad sa politika, gusto niyang mahimong mayor sa Digos.