Delos Reyes: Magkadugo kon ipugos pagduso

Seth delos Reyes

NAKITA niadtong Nobyembre 30, sa pagsaulog sa birthday ni Gat Andres Bonifacio ang duha ka nagkaatbang nga grupo sa katawhang Pilipino.

Singgit sa mga supporter ni Presidente Rodrigo Duterte nga ideklara na ang Revolutionary Government (RevGov) samtang nialkontra ang mga anti-Duterte tungod labaw pa kuno sa martial law ang kabangis sa pangulo kon ipailalom sa RevGov ang nasud.

Apil sa mga kontra sa presidente ang pipila sa mga nahimong miyembro sa gabinete gikan sa walhong pundok nga wa mauyoni sa mga miyembro sa Commission on Appointment ug ang mga walhon nga apil sa pagpangampanya sa kadaugan ni Duterte niadtong panahon sa eleksiyon.

Posible nga mag-abot ug magharong sa umaabot nga mga adlaw tungod sa managlahi nga baruganan tungod sa pagtoo sa mga anti nga daghan ang maligsan ug malapas ang tawhanong katungod ugaling ideklara ang RevGov.

Hinuon, mismong si Presidente Duterte nagsulti nga dili siya modeklara niini.

Rason sa mga pro nga alang kuno sa hingpit nga katumanan sa "Tunay na Pagbabago" nga dili maimplementar tungod nahimong babag ang Constitution sa Pilipinas.

Ang 1987 Constitution sa Pilipinas usa ka Written Constitution nga gimugna sa Constitutional Commission gipangunahan ni Cecilia Munoz Palma, ubos sa Revolutionary Government ni Presidente Cory Aquino.

Nahimong tunhay ang pag-ilis sa Constitution sa Pilipinas tungod gikan man sa pag-alsa sa katawhan ug pagpalagpot kang Presidente Ferdinand Marcos.

Nakalatid sa Article XVII sa 1987 Constitution nga ang mga basihan sa pag-usab o pag-amenda sa Batakang Balaod sa nasud ug ang pamaagi sa pag-usab niini. Ang Sec. 1. (1) The congress, upon a vote of three-fourths of all its members or

(2) A constitutional convention.

Section 2 nagkanayon, "Amendments to this constitution may likewise be directly proposed by the people through initiative upon a petition of at least twelve per centum of the total number of registered voters, of which every legislative district must be represented by at least tree per centum of the registered voters therein."

Sa boto sa two-third sa mga miyembro sa congress mopatawag sa constitutional convention o pinaagi sa majority vote sa mga miyembro sa kongreso pauyonan sa mga botante ang pangutana sa pagmugna sa convention.

Lahi ang mahimong kahimtang karon ugaling moalsa ang katawhan kay aron ibasura ang Constitution ug ipahimutang ang Federal Form sa gobyerno. Ang tumong dili aron palagputon si Presidente Duterte.

Usa kini ka revolution kontra sa Constitution. Ang dakong pangutana, puwede ba?

Si Senate President Koko Pimentel nagsulti nga dili sila supak sa Pederalismo nga gobyerno. Himuon lang ang saktong proseso sumala sa Constitution.

Dili sama sa pagbalhin sa linung-ag gikan sa kaldero ngadto sa plato aron saluhan sa pagkaon. Kon pinugos ang pagpatuman mahimong madugo labi na nga professional na ang mga kasundalohan nga nagatan-aw kon nasubay ba o sukwahi sa Constituion ang kamandoan.