Delos Reyes: Unsa kaha kon dili si Duterte?

Seth delos Reyes

HUMAN sa 31st Association of Southeast Asian Nations (Asean) Summit nga gipahigayon didto sa kaulohan, mas mihayag ang panglantaw sa katawhan sa mamahimong kaugmaon sa mga Pinoy ubos sa pamunoan ni Presidente Rodrigo Duterte.

Gipalig-on ang panaghigalaay sa Pinas ug mga silingan nga nasud sa habagatang sidlakan sa Asia nga nagkahiusa alang sa kahusay, pagsinabtanay, pagtinabangay aron ang tanan mag-uban sa paglambo apil ang mugna sa mga talamdan aron pagsulbad sa panagbingkil sa West Philippine sea.

Ang bilateral meeting ni Pangulong Duterte sa mga pangulo ug representante sa mga nasud mibunga og daghang ayuda alang sa administrasyon ni Pangulong Duterte apan ang mga kontra nagpunay lang pagpangita og sayop aron himuong isyu.

Ang mga negatibo o pessimistic nga mga tawo buta sa mga maayong butang aron dunay ikasaway. Ang pessimistic nga tawo human mitutok sa Rosas nagkanayon, "Sayang dunay tunok ang bulak".

Dihang mipuli pagtan-aw ang optimistic nga tawo siya miingon, "Salamat dunay bulak sa mga tunok".

Dunay pipila nga nagsulti nga usik-usik sa kuwarta ang Asean summit, maayo pa kuno unta gitabang sa mga kabus.

Sayud ba mo nga ingon ana usab ang panghunahuna ni Hudas dihang gidihog ni Maria Magdalena ang mga tiil ni Hesus?

Wala ko nagsulti nga mga Hudas ang mga nanaway, pareha lang ang ilang hunahuna.

Pagtraydor kuno sa nasud ang wa paghisgot ni Pangulong Duterte sa hukom sa Permanent Court of Arbitration didto sa The Hague panahon sa Asean Summit.

Ang ilang gusto nga ipursige sa pangulo ang desisyon sa International Arbitral Court nga Pilipinas ang dunay katungod sa West Philippine Sea kay walay basihan ang pag-angkon sa Peoples Republic of China nga silay tag-iya sa maong dapit.

Mas gipili ni Duterte nga magpabilin ang kalinaw kay dili lang China ang nagaangkon, duna pay ubang mga nasud nga mipasibaw sab sa ilang pag-angkon sa dapit.

Posible nga mahimong pabilo sa gubat batok China kon dili maalamon ang pakighinabi kanila tungod wa giila sa ilang gobyerno ang International Arbitration Tribunal.

Sa akong yano nga pagsabot daw gusto sa pipila nga mahimong gubot ang administrasyon ni Duterte. Ang tataw nga hinungdan mao ang sobra nga pamolitika sa nasud.

Ang mga silingan nga nasud gusto nga mahimong katambayayong alang sa kalamboan apan ang pipila ka mga politiko nga panahon sa pagpangampanya miingon nga gusto moserbisyo alang sa katawhan nahimong sukwahi kay nahimong babag sa paglambo. Unsa kaha kon sila ang motimon sa atong nasud?

Hinuon, dili kini bag-o nga kahimtang kay sa kasaysayan sa atong nasud matud sa akong naabtan nga mga katiguwangan panahon kaniadto sa gubat diin ang mga gerilyang Pinoy manago, Pilipino ra gihapon ang motudlo.

Sa kahimtang sa nasud nga puno sa problema ug kaguliyang, mga batan-on ug hamtong nahimong ulipon sa druga, mga kawani sa gobyerno nalambigit sa kurapsiyon, unsa kaha kon dili si Duterte ang nahimong Presidente?