Genoguin: Mga panglantaw sa politika sa 2022

Al Genoguin

Nahimo nang batasan sa Pilipino sa natad sa politika bisan kon bag-o pa lang midaug sa milabay nga piniliay, sa unang adlaw palang sa ilang paglingkod sa katungdanan, may mga plano na alang sa sunod nga eleksiyon kon unsa nga posisyon ang ilang daganan.

Sa milabay nga semana, bisan kon layo pa ang 2019 lokal ug National election, ang partido PDP-Laban nagpagawas na ug mga pasiunang kandidato alang sa pagka-senador. Ug kini daw sila si Mocha Uson, Francis Tolentino, atong Congressman sa unang distrito sa Davao, Karlo Alexie Nograles, Geraldine Roman, Albee Benitez ug ang bag-ong Malacañan spokesperson Harry Roque, si Speaker Pantaleon “Bebot”Alvarez, modagan pagka senador kon maoy gusto sa atong presidente.

Balikan ta ang nangagi, nalibkas na sa baba sa atong presidente nga si Mayor Inday Sara mao ang gusto niyang mopuli sa iyang posisyon inigkanaug na niya sa Malakanyang sa tuig 2022.
Hinuon, gibakwi ra usab dayon sa atong presidente nga dili daw mosugot si Inday kay gusto gani moresayen sa pagka-mayor niadtong unang adlaw sa iyang katungdanan, bisan si Inday hugot nga mibalibad.

Mga panlantaw sa politika sa 2022, dili nimo basehan sa ilang gipanulti kon dili sa ilang plano ug buhat., Una, nganong mudagan man si Mayor Inday pagka-Congressman sa unang distrito nga duna paman siya’y duha ka termino sa pagka-mayor inigkatapus sa 2019? Hangtud pa siya sa 2025.

Ang mga panglantaw ug pangagpas sa mga eksperto sa politika dili malikayan nga dunay plano
nga lutuon nang daan karon tungod kay segurado man gyud nga wa’y mga politiko nga moatbang sa mga Duterte diri sa Davao, segurado nang Congresswoman ang atong mayor Inday Sara.

Kon modagan si Speaker Pantaleon Aalvarez ug Senador, klaro na kaayo ang mensahe nga si Congresswoman Inday Sara, mao na ang pinaka-unang babaye nga Speaker sa Kongreso sa tuig 2019, ug pagpangandam na kini sa bugnong lugaynon pagka-presidente sa tuig 2022.

Mas maayo ang pundasyon sa pagka-Speaker sa kongreso kon itandi sa senador, tungod kay kon speaker ka, may kontrol ka sa mga kongresista sa ilang tagsatagsa ka distrito.

Layo pa ang 2022, kining ato mga pangagpas lang posibleng matinuod, posibleng dili, daghan pang mahitabo una moabot kanang tuiga pero, gibasihan lang nato ang ilang mga plano nga mura ug duol-duol sa tinuod.

Gani, bisan sa atong mga obserbasyon walay motuo nga mopahulay na sa politika ang atong Vice Mayor Paulo Duterte, karon pa hinuon nga wala na’y mga politiko nga mangahas pag-atbang nila dinhi sa Davao?

Kon disninasyon sa amahan nga mahimong mayor ug presidente, ug ang anak usab nga nahimong mayor, dili layo nga mahimo usab siyang presidente kon kapalaran sa mag-amahan nga pareha ang ilang distinasyon, di ba?