Editoryal: Militanteng party-list wagtangon sa Kongreso

SA TINGUHA nga wagtangon ni Pangulong Rodrigo Duterte ang militanteng party-list sa Kongreso, labing seguro nga mosilaob sa kasuko niini ang militanteng grupo.

Gawas pa kanila, labing seguro dunay himuon nga lakang ang New People's Army (NPA) nga gituohang kaalyado sa mga militante nga party-list sa nasud.

Giluwatan kini sa Pangulo human naitok siya sa NPA nga gitudlong hinungdan sa kamatayon sa upat ka bulan nga bata lakip na sa duha ka pagpamanhig didto Bukidnon niadtong Nobyembre 9 ning tuiga.

Misamot ang kasuko sa Pangulo dihang gipatay sa NPA ang usa ka pulis nga taga Davao City.

Gitumbok sa Pangulo ang pagkonsabo sa NPA ug militanteng party-list nga hinungdan sa padayong rebelyon.

"We will study and maybe we will have a crackdown here somewhere. Nagsasawa na ako dito sa kalokohan nila," pung ni Duterte.

Isip tubag, si Anakbayan national chairperson Vencer Crisostomo nagkanayon nga ang pahayag sa Pangulo nagpakita lamang nga di siya makadawat sa kritisismo ug labaw sa tanan ang iyang pagkauhaw sa gahum.

Kon ipamugos sa Pangulo nga wagtangon ang militanteng party-list, sayon lamang alang kanila
tungod kay mayorya sa Kongreso ang kaalyado sa Pangulo nga mao unya ang mag-amenda sa balaod sa party-list system.

Ug kon mahitabo kini, di kaha mosamot ang kagubot sa nasud?