Compio: Panaygon

Jeepy P. Compio

PIPILA ka adlaw na lang saulogon na nato ang Pasko ug sugaton nga mainiton nga puno sa kasadya ang Bag-ong Tuig.

Abi nako'g layo pa ang pasko, pero giingong daw maihap naman lang diay sa mga tudlo.

Sa miaging adlaw man god, kaadlawon na ko nga miuli ug miagi ko sa balisbisan sa maong silingan diin ang ilang balay napuno sa mga Christmas lights.

Mihunong ko kadali. Gipangtan-aw nako ang mga nagkalain-laing kolor sa gagmay nga bombilya nga nagkidlap-kidlap nga nasusama sa mga bituon.
Nakaingon kos akong kaugalingon, pasko na. Dayon mipadayon kos paglakaw ug kalit ko nga giduaw sa kamingaw, -- kamingaw nga subling nabalik akong hunahuna niadtong bata pa ko.

Sa akong kabatan-onan, kini laging nagpuyo ta sa eskuwater, nabatasan namo nga manumbalay mi'g panaygon, unya pirmi ko nga mabiyaan sa panon kay magsud-ong pa man ko sa mga nagkidlap-kidlap nga mga bombilya.

Mouli kos balay nga maghilak, kay gibiyaan kos akong mga kauban, pero pagka-ugma mouban na pod ko kanila, ug mabiyaan na sab ko.

Naglibog ko karon nga naghunahuna nga nagtinanga lang ba ko sa una o mubo lang kaayo akong kalipay sa mga butang nga simbolo sa pasko?

Pero dihang mga nag-edad nako'g 13-anyos, daw mauwaw nako, ug di na ko mouban nila kay mora'g lainan na man ko nga magdala og taklob sa kaldero dayon dukdokon og bato, hahahaha.

Bitaw, panahon lang na sa akong kabatan-onan matag panahon sa pasko ug padung sa bag-ong tuig, nga maoy sagad mahitabo sa kinabuhing bagets.

Karon kaha nga mga bagets, maulaw na seguro manaygon, kay ang hunahuna naa pirmi sa cellphone, sige'g iskrol unsay update sa Facebook, sa IG ug sa Twitter, ang uban, busy sa mga computer games.

Aber, sulayi daw og pangutana imong kaugalingon karon, nakaagi sab ka ba niini nga kagahapon? Dako akong pagtuo nga nakaagi ka gayud, di ba? ug sugdi sa paghinumdom ang kaagi niadtong nanaygon ta, nga usahay gukdon pa og iro, usahay masuko pa'g P1 lang ang ihatag sa gidaygonan, hahahaha.

Pagtimbaya

Lain pay ato, daghang thank you diay sa pag-abi-abi nako niadtong mibisita kos inyong lugar, sa akong amigo diha sa Tagum City nga si Arnel Mamac, thank you, Ar, unta mas labaw pa sa among pagbalik.

Ingon man ni "yours" ang guwapa nga tindera og siomai sa Tagum terminal ug kang Wahid, daghang thank you!

Ug sa akong di basta-basta nga amigo, nga gianha ko lang gayud sa iyang seminar, Dr. Jed Acero, ang DurianMan, ang Kadiya ug ang bantugan nga Bertudan.