Editoryal: Taktakon sa serbisyo

TALIWALA sa subsob nga kampanya sa gobyerno batok sa ilegal nga druga, duna pa gihapoy daghang mga indibiduwal nadakpan kay padayong naglambigit sa dautang kalihukan.

Ang nakasubo kay, di lang diay, naa sa mga tago-tago ug pribado nga lugar makaplagan kining mga tigpayuhot ug tiggamitan sa druga, bisan diay mismo sulod sa buhatan sa kagamhanan.

Kay ning bag-o lang, tulo ka mga kawani sa City Hall ning siyudad gipalagpot tungod kay nagpositibo sa druga. Kini base sab sa gilusad nga mandatory random testing sa mga empleyado sa City Hall niadtong Oktubre, subay sa mando ni Mayor Sara Duterte-Carpio.

Ang tulo kabahin sa 1,127 ka mga kawani sa kagamhanan nga gipailawom sa drug test.

Ubos sa Civil Service Law, bisan kinsa nga empleyado sa kagamhanan nga mapamatud-an nga nalambigit sa anomaliya ug paggamit sa gidiling druga taktakon gayud sa katungdanan.

Nasayud kita nga di lang dinhi sa siyudad nahitabo kini. Gani, kanunay nang gisulti ni Presidente Rodrigo Duterte nga dunay mga barangay opisyal, konsehal, mayor, gobernador ug uban nalambigit sa illegal drugs.

Ingon niini, kadako ang suliran sa druga sa nasud gumikan kay bisan mga dagkong politiko nagawngan na man sa dautang bisyo.

Busa haum lang nga kanunayon ang mandatory random drug test sa mga local government units (LGUs), di lang dinhi sa dakbayan, apil na sa uban pang mga dapit sa Pilipinas.

Pinaagi niini, masayran ug madakpan ang mga kawani nga nalulong na sa gidiling druga.

Ang mapamatud-an, angay lang sab nga taktakon sa serbisyo.