Editoryal: Tinuod o di?

KANUNAY na kitang makadungog og mga balita nga dunay gipangdagit o gikidnap nga mga menor de edad sa kaulohang Manila. Uban gani kanila mga masuso pa sulod mismo sa mga ospital.

Giingon nga gikidnap o gidagit sila aron nga himuong mga ulipon o kaha panguwartahan sa mga sindikato.

Samtang ang uban giingong gipangkuhaan og mga organ sa lawas aron nga ibaligya. Hinuon, wa pay tataw nga ebidensiya kon tinuod ba kini o dili.

Duna say uban nga gipangdagit, apan pagkasunod adlaw, makita na lang nga wala nay kinabuhi ug gipanglugos na.

Kini ang kabalaka sa pipila ka mga ginikanan ngadto sa ilang mga anak ning panahona. Ilabi na nga dunay gitaho niadtong milabay nga adlaw nga 8-anyos nga gisulayan matud pa og kidnap didto sa may Bago Aplaya ning dakbayan.

Base sa gi-post sa Davao City Public Inquiry Page, naluwas sa mga barangay tanod ang bata ug gisaysay niini nga mga armadong lalaki ang misulay pagkidnap kaniya pinaagi sa pagpugos sa pagpasakay kaniya sa itom nga sakyanan.

Apan nakahimo matud pa pag-ikyas ang bata gikan sa iyang mga kidnapper.

Apan ang hepe sa Talomo Police Station nga si Chief Inspector Oliver Navales nagbutyag nga walay police report nga giduso ngadto sa buhatan sa susama niini nga insidente.

Apan bisan pa niini, nagmando gihapon siya sa iyang mga pulis nga subayon ang hitabo.

Angay lang gyud tuod nga susihon kini sa kapulisan, tinuod man o di, aron nga mahupay ang kabalaka sa ginikanan base sa pahayag sa biktima.

Kay matud pa sa pahayag sa biktima nga iyang nakita sab ang lain pang duha ka bata, lalaki ug babaye, nga tua sa sud sa sakyanan una pa siya naka-ikyas sa mga armado.

Mas maayo nang masusi og maayo ang hitabo aron nga maklaro kon duna ba kini kamatuoran o wala ba. Kay di kita motugot nga mahitabo kini dinhi sa atong dakbayan.