Dura: Pagtiurok sa survey ug away sa DDS bloggers

NIADTONG Lunes duha ka mga hitabo ang gipiyestahan sa mga netizens sama sa pagtiurok sa satisfaction ug trust rating ni Pangulong Rodrigo Duterte ug away sa mga DDS Bloggers.

Unahon nato paghisgut kining pagtiurok sa survey sa Pangulo nga miani og nagkadaiyang reaksyon sa publiko.

Kon ang mga dumadapig nga political analysts sa Pangulo ang pasultihon, way nada ang survey tungod kay mahimo kining maneobrahon.

Gani giingon ni Presidential Spokesperson Ernesto Abella nga bisan mitiurok ang survey sa Pangulo, nagpabilin gihapon ang gugma kaniya sa mga Pilipino.

Giingon sa Malakanyang nga magpadayon ang giyera kontra druga sa gobyerno bisan pa man nga malubong pag-ayo ang satisfaction ug trust rating sa Pangulo.

Sa akong nakita, wa kini epekto sa Pangulo tungod kay sukad pa kaniadto, wa sa iyang bukabularyo ang survey.

Alang sa atong Pangulo, bisan pa man nga mougsok ang iyang rating, iya gyung himuon ang gituohan niyang husto nga bahaton alang sa kaluwasan sa mga Pilipino. Mao sab ni akong gibiliban sa atong Presidente.

Dunay daghang nagsulti nga miugsok ang rating sa Pangulo tungod sa isyu sa pagpamatay ug binilyon nga salapi sa bangko, subay sa alegasyon ni Senador Antonio Trillanes IV.

Wa kita masayud kung unsa ang basehan sa 1,500 ka mga tawo nga gipangutana sa Social Weather Station kay di man kita ang nagdala sa ilang huna-huna.

Alang nako, maayo tingali nga bisitahon pag-usab sa administrasyon ang ilang mga polisiya, programa, ug proyekto ning panahona, kay basin apil na dinhi ang pag-ubos sa balor sa piso kontra dolyar, pagmahal sa palaliton sa merkado, ug ang wa natuman nga mga saad sa Pangulo.

Ning pagtiurok sa rating sa Pangulo, himuon unta sa gobyerno kini nga sumbahan sa maayong policy making process nga akong nakat-on sa public administration diin apil dinhi ang opinyon sa tanang ahensya sa gobyerno, stakeholders, media, lakip na oposisyon.

Away sa DDS Bloggers

Samtang nalingaw ko nga nagbasa sa mga opinion sa netizens sa Facebook, nasagap sab nako ang pagyawyaw sa video ni Lawyer Bruce Rivera ngadto sa kaubanang Diehard Duterte Supporters.

Pipila sa iyang mga giyawyawan si Thinking Pinoy blogger RJ Nieto ug Sass Rogando Sasot nga mga lunod-patay nga dumadapig sa Pangulo.

Daghan siya og mga gipangtabi sa maong video labot sa ilang away. Di nalang nato usa-usahon kay mahutdan kita og espasyo.

Apan usa sa iyang gibulgar mao nga ang grupo nila Sass maoy tinubdan sa fake news sama sa gipakatag nga #LeniLeaks nga nagdaut sa pagkatawo ni Vice President Leni Robredo.

Kon mao kini ang nahitabo sa grupo, di kaha hinay-hinay na nga nahugno ang mga bakak sa kaugalingon nga gibug-aton?