Rodlan: 'Adlaw nga walay prostitusyon'

Emmanuel C. Roldan

GINASAULOG matag Oktubre 5 ang "Day of No Prostitution" o adlaw nga walay prostitusyon sa pipila ka nasud sa kalibutan.

Kampanya kini sa civil society organizations ug non-government organizations (NGOs) aron ipakaylap ang kabangis og abuso nga natagamtaman sa kababayen-an nga nasulod sa prostitusyon.

Usa ang Pilipinas nga naglusad sa maong kampanya tungod sa kadako sa problema kabahin sa prostitusyon nga dala sa kapobrehon ug ang dili patas nga tratamento sa kababayen-an bisan luyo sa daghang balaod sa pagprotekta sa kababayen-an sa nasud.

Dinhi sa Davao, ang "Day of No Prostitution" gipasiugdahan sa Talikala, Inc., usa ka NGO nga anaay opisina sa Doña Vicenta Village ug 30 ka tuig na nga nagtabang sa kababayen-an ug kabataan nga anaa sa kahimtang. Kung wa ko masayop, ang kampanya gisugdan niadtong 2005 diha sa usa ka seminar house sa dalang Anda ning siyudad.

Usa sa mga dinapit nga mamumulong niadtong panahona mao ang iladong aktres nga si Dawn Zulueta ug ang batid nga abogada nga si Atty. Evalyn Ursua.

Buot niining maong kampanya nga bisan sa usa ka adlaw man lang sa tuig walay babaye nga napahimuslan ug walay lalaki nga nakapahimulos og babaye o lalaki nga anaa sa kahimtang sa prostitusyon.

Wala na nako ma-update ang akong datos apan mokabat og 100,000 ang ihap sa anaa sa kahimtang sa Pilipinas.

Daghan sab nga mga babaye ug bata nga nabiktima sa trapiking matag tuig nga nahulog sa prostitusyon imbis nga makatrabaho og disente tungod sa kalisud o sa kahimtang sa ilang panimalay nga ilang gilikayan.

Moabot sab og dul-an 3,000 ang anaa sa prostitusyon dinhi sa Davao.

Kadaghanan kanila mga freelancers, mga Guest Relations Officers, akyat-barko, "prosti-tuition" ug uban pang porma sa ilang kahimtang.

Hangtud karon, magdumili pa ang kasagarang mga women's rights advocates sa Pilipinas nga tawagong "trabaho" ang prostitusyon, hinunua, giila kini nga porma sa pagpangdaugdaug, pagpang-abuso ug kabangis tungod sa gahum.

Dili trabaho ang prostitusyon kon dili pagpangbiktima sa gamhanan ngadto sa mahuyang; adunahan ug pobre; may kinaadman batok walay hibangkaagan.

Sa Pilipinas gidili gihapon ang prostitusyon. Gani daghang balaod nga nagsilot sa pagpangdagmal ug pagpahimulos sa kababayen-an ug kabataan.
Apan ang nagpadayong kalisud ug ang kawalay oportunidad sa maayong trabaho maoy nakapatukmod nga magpadayon kining maong panghitabo.

Ambot kaha kung natinuod ba kadtong gihanyag sa lokal nga kagamhanan nga ilang pasudlon og trabaho ang mga anaa sa kahimtang?

Sa akong nasayran, dugay na kining gipakigbisogan sa Lawig Bubai nga maoy organisasyon sa mga survivors sa prostitusyon dinhi sa Davao nga gitukod sa Talikala. May pipila nga akong nasayran nga nakatrabaho kadali sa City Social Services and Development Office ug sa City Mayor's Office apan wala pod nidonar og dugay.

Makahimumdom ko nga sa panahon sa Pasko kaniadto, nagpahigayon ang atong kanhi Mayor ug karon Presidente Rody og salo-salo alang sa tanang anaa sa prostitusyon. Matag usa nagmalipayon gyud kay adunay bitbit nga gasa pagkahuman sa programa.

Ang prostitusyon maoy usa sa mga isyu sa proteksiyon sa kababayen-an ug kabataan nga angayang sulbaron sa kasamtangang administrasyon. Unta mahatagan kini'g pagtagad!