Editoryal: Kilusang Pagbabago

MIKAYLAP na karon ang Kilusang Pagbabago (KP) sa tibuok Pilipinas. Kini nga grupo namugna aron maoy modepensa ni Pangulong Rodrigo Roa Duterte.

Ang Kilusan gilangkuban sa mga opisyales sa gobyerno ug ubang sektor nga nakadayeg sa pagdumala sa Pangulo sa nasud.

Bisan mag-uwan pa og bangkaw, kining mga tawhana andam magpakamatay mapanalipdan lang ang Hepe Ehekutibo.

Kamatuoran nini mao ang ilang gihimo nga Lihok Suporta 2 sa Plaza Independecia sa Sugbo diin sila nagpasinguwan niadtong Sabado, Oktubre 7.

Sumala ni Doris Isubal-Mongaya, lead convenor sa Kilusang Pagbabago Visayas, nga gihimo nila ang maong kalihokan aron pagpadayag sa ilang padayon nga suporta sa presidente.

Kini taliwala sa mga plano nga bungkagon ang administrasyon ingon man di matuman ang plano niini nga kausaban.

Gawas sa KP chapter sa dakbayan sa Sugbo, nitambong usab kagahapon ang mga miyembro sa Western ug Eastern Visayas lakip niini ang Bohol, Panay, Negros, Tacloban ug Ormoc.

Nitambong usab ang manghud ni Duterte nga si Emmanuel “Don” Duterte diin mapasalamaton kini sa mga nitambong sa maong lihok suporta.

Lakip usab nga nitambong si Cabinet Secretary Jun Evasco Jr., kinsa nihatag usab sa iyang mensahe sa mga nanambong.

Ang KP gimugna aron maoy mokontra sa mga militanteng grupo nga magprotesta sa mga polisiya sa gobyerno.

Nindot ni kay dunay manalipod sa Pangulo, apan hinaut unta nga di salapi sa gobyerno ang gamiton panahon sa ilang mobilisasyon, kay natural nga daghan gayud ang motambong kon adunay madawat nga kalipayon gikan sa gobyerno.