Genoguin: Trillanes miyembro sa CIA?

Al Genoguin

KARONG adlawa ipadayon sa Senate Blue Ribbon Committee ang imbestigasyon in aid of legislation may kalabutan sa P6.4-bilyon shipment sa shabu, nga gituhoang taga Davao kuno ang tag-iya o mas nailhan nga Davao Groups.

Dili na hinuon motambong ang atong bise mayor nga si Paulo "Pulong" Duterte ug ang kapikas ni Mayor Sara nga si Atty. Manases Carpio.

Sumala pa, aduna pa kunoy ilatag si Senador Antonio Trillanes agi'g dugang ebidensiya nga naglambigit sa atong Vice mayor, Charlie Tan, Nilo "Small" Abellera ug Kenneth Dong.

Segun sa atong nahibaw-an, si Tan iladong negusyante dinhi sa atong siyudad, samtang si Dong supplier sa usa ka negusyante nga maoy tag-iya sa Davao Import Distributor.

Dili gyud kalikayan nga ang mga dagkong negusyante mamahimong kaila, ug suod nga higala sa atong mga lokal opisyal sa dakbayan tungod kay kining mga dagkong negusyante modikit gyud og mga politiko aron magmalampuson ang ilang legal nga negusyo.

Pero sa negusyong druga, sukad sa kasaysayan wala kita'y nahibaw-an nga sila maoy supplier niinisa atong siyudad sa Davao. Sukwahi sa gipakita ni Senador Trillanes nga niadtong bulan kuno sa Disyembre 2009, may shipment sa cocaine dinhi sa Davao nga nagkantidad og P126 milyon, ug giusban pa niadtong bulan sa Septyembre 2014.

Ang atong gikatingad-an, nganong nahibawo si Senador Trillanes niini kon tinuod man, asa gikan ang iyang information?

Labaw sa tanan, ang pinakapribadong dapit sa atong lawas, ang ato lang asawa maoy bugtong nasayud ana?

Pero nganong nasayud man si Senador Trillanes nga adunay tattoo sa likod nga bahin sa lawas sa atong vice mayor?

Maayo unta pagsugod gyud sa pangutana, wala na lang unta angkona sa atong halangdong vice mayor nga aduna siya'y tattoo sa likod, aron walay gamay nga pagduda ang mga katawhang Pilipino, walay bali alang kanatong Dabawenyo kay di man gyud ta motuo niana.

Miyembro kaha si Senador Trillanes sa Central Intelligence Agency (CIA)?

Kadudahan man god ang mga panglihok-lihok, bisan sa pagrespeto na lang sa atong presidente, nga adunay mandato sa katawhang Pilipino, dili niya irespeto, klaro kaayo nga adunay gisaligan, di ba?

Kon aduna may mas labing nasayud sa mga international nga sindikato sama sa Triad, ang CIA maoy unang nasayud ana.

Ang delikado lang og isakripisyo si Senador Trillanes ug ipa-assassinate both Triad and CIA, segurado nga ang atong Presidente maoy pasanginlan, tungod kay babag si Duterte sa dakong negusyo sa Triad, ug ang atong Presidente usab anti-America.

Atong i-ampo ang atong Presidente nga sa tanang higayon panalipdan siya sa atong Labaw'ng Makagagahum.

Tungod sa iyang kampanya sa kurapsiyon ug druga gisugal na niya ang iyang kinabuhi ug tibuok pamilya. Ingat Mr. Presidente.