Editoryal: Senado ang mabasol

HANGTUD karon wa pa gyuy igong katinoan kon mahinayon ba ang piniliay alang sa Sangguniang Kabataan (SK) ug sa barangay nga gikatakda unta karong Oktubre 28 (sunod buwan).

Kini human nga wa pay balaod nga napasar kon kanus-a ug unsang petsaha mapahigayon ang maong piniliay nga gikatakda unta karong umaabot nga Oktubre 23.

Ang Kongreso kagahapon mipapasar sa ilang ikatulong pagbasa sa ilang balaudnon mga nag-uswag sa piniliay ngadto sa Mayo 2018.

Kini na lay paglaum nga ma-postpone ang nahisgutang eleksiyon tungod kay ang Senado wa man makaumol og ilang kaugalingong balaudnon nga mag-uswag sa piniliay ngadto sa Oktubre sunod tuig, segun sa ilang kagustohan.

Adto na kini isumiter sa Senado alang sa deliberasyon. Anaa na karon sa kamot sa mga senador ang paghukom.

Ning uwahi lang, ang Comelec mipahibawo nga andam gihapon sila nga mopahigayon sa eleksiyon karong Oktubre 23 nga maoy gikatakdang petsa.

Gani ilang giawhag nga kadtong mga gustong mokandidato mahimong mo-file na sa ilang certificates of candidacy sa uwahing bahin ning buwana.

Pastilan. Kon mahinayon, dili kaha magkayagaw na hinuon ang pagpahigayon niini tungod sa kakulang sa preparasyon?

Kining pagpangangkon sa Comelec nga andam sila niini, kadudahan pa kay sila mismo diha sa ilang buhatan adunay kasungian kalabot sa ilang chairman nga si Andres Bautista.

Unya daghan na usab sa mga taga barangay ang wa kapangandam niini tungod kay nabaniog lagi nga mauswag gyud ang maong piniliay.

Kon way balaod nga mapasar kalabot niini, ang Senado maoy angay natong basulon. Daw wa nila hatagi og importansiya ang barangay.