Roldan: Conspiracy story (2)

Emmanuel C. Roldan

ATONG gihisgutan ang gitawag nako nga "conspiracy story." Kung atong hubaron sa bisaya kay istorya sa pagkunsabo" aron mahugmak ang gobyerno o ang usa ka lider ug ilisan og lain.

Sama pananglit sa pakigkunsabo nila ni kanhi General Fidel V. Ramos ug defense secretary Juan Ponce Enrile sa Central Intelligence Agency (CIA) aron lumpagon ang diktadorya ni kanhi Presidente Ferdinand Marcos nga nisangko sa "civilian-backed military revolt" sa Edsa.

Ang unang conspiracy story nga atong gihisgutan mao ang pagbahad sa CIA kang PRody nga patyon kung mopadayon pag-alkontra sa interes sa United States of America (USA), pagduso sa "independent foreign policy," ug pagdapig sa China ug Russia.

Mora'g sakto kining atong istorya kay niadtong niaging semana, nipaguwa og pamahayag si Jose Maria Sison nga founding chair sa Communist Party of the Philippines (CPP) sa plano sa CIA sa pagtipi kaniya ug kang President Rodrigo Duterte.

Kahibalo kita nga di mabangbang ang baba ni PRody sa pagbatikos sa US.
Magpadala daw'g hitmen ang CIA aron patyon ang lider sa CPP ug si PRody aron tuldokan na ang hinabing pangkalinaw.

Ang ikaduhang conspiracy story nga atong hisgutan kay may kalambigitan gihapon sa nahiuna.

Giangkon ni Duterte nga sosyalista siya nga maoy tipo sa panggobyerno sa China, Russia, Cuba, Uruguay, ug uban pa.

Gisalikway niya ang paagi sa kapitalista sa mga datong nasud sama sa US nga maoy mitsa sa giyera ug sa nagkuyanap nga kapobrehon sa kalibutan.

Motuo ako sa giingon nga naghatag ang kalibutan sa tanang panginahanglan sa tawo apan dili sa tanang kahakog sa pipila "there is enough for every need, but not for every greed."

Mao kini ang gikapungtan ni Duterte nga pagguba sa iyang nasud aron modato ang pipila nga adunahan sama sa negusyo sa druga, ug langyaw'ng pagmina.

Sa laktod nga pagka-istorya dapig si PRody sa panghunahunang walhon sa sosyalista ug komunista, wa lay labot ang armadong pakigbisog.

Tungod niini, kinahanglan niyang mosandig sa kontra sa kapitalista nga mao ang China, Russia ug uban pang haring gangis aron dili daling mairok sa resbak unya sa US.

Gideklara niya ang "independent foreign policy" aron dili na kita mahimong itoy sa US, hinunua higala na sa Pilipinas ang tanang nasud nga gustong makighigala pinaagi sa negusyo, kulturanhong pakiglambigit, pagduso sa kalinaw, isports, ug uban pa.

Dinhi sa sulod, kinahanglan nga mosandig siya sa katawhan nga nagpadaug kaniya sa 2016 nga piniliay. Sila kadtong masa nga nangandoy og kausaban sa pagpasuwabi sa kapitalista ug nagkinahanglan sa iyang tabang.

Sila usab kadtong dali nga mosagop sa ideya sa pantay-pantay nga kinabuhi nga gihanyag sa sosyalista. Mao kini ang basihan sa iyang pagduso sa sistemang Pideralismo nga medyo duol-duol sa sistemang sosyalista.

Busa nituo ako nga mopadayon ang hinabing pangkalinaw sa tanang rebeldeng grupo ug kining mora'g panag-away karon apil sa drama sa CPP ug administrasyon ni Duterte aron mapugngan ang lakang sa CIA sa pagpatay kanila.

Kinahanglan ni Duterte ang tanang puwersa sa AFP ug PNP, way labot ang sobra 100 ka heneral nga pro-US, aron ipatindog ang Pilipinas nga dili gunit sa liog sa Amerika.