Editoryal: Espenido gidayeg

TUNOG kaayo ang pangalan karon ni Chief Inspector Jovie Espenido human gipuhag ang gika-intapan nga Kuratong Baleleng Gang sa Ozamiz City nga gipangulohan ni anhing Mayor Reynaldo "Aldong" Parojinog.

Sa gihimong ronda, 16 ka mga tawo ang napatay, apil na ang mayor mismo ug ang iyang asawa.

Samtang nadakpan sab sila si Vice Mayor Nova Princess Parojinog, anak sa napatay nga mayor, ug lain pang igsuon niini nga si Reynaldo Parojinog Jr. ug daghan pang uban.

Giingong di basta-basta ang mga Parojinog sa Ozamiz City kay duna man kini mga sindikato ug mga ilegal nga kalihukan sa druga sa siyudad sa dugay nang panahon.

Apan wala mobahag ang ikog ni Espenido kay human siya gi-asayn sa dakbayan, gibangga niini ang dakong pader hinungdan sa pagkapuhag sa grupo.

Kahinumdoman nga si Espenido sab ang miunay og ronda sa balay ni kanhi Albuera, Leyte Mayor Rolando Espinosa Sr., amahan sa banggiitang drug lord sa Eastern Visayas, Kerwin Espinosa Jr. kon diin daghang mga bodyguards niini ang nakalas samtang daghan sab nga mga shabu ang nasakmit.

Nahitabo kini sa dihang siya pa ang hepe sa Albuera sa Leyte.

Apan napatay si Mayor Espinosa sulod sa bilanggoan sa mga sakop sa Criminal Investigation Group 8 nga gipangulohan ni Superintendent Marvin Marcos human matud pa misukol sa dihang gisilbi ang warrant of arrest batok kaniya.

Bisan tuod kon duna say mibatikos kang Espenido apan katawhan sa Ozamiz City midayeg kaniya tungod sa gikonsidera niyang bayanihong buhat.

Gani daghan nang nagtinguha nga madestino si Espenido sa ubang mga lugar aron nga masumpo sab niini ang kalihukan sa illegal drugs ug mga kriminal.

Di matupngan ang kaisog nga gipakita ni Espenido sa iyang pagpangalagad kay mga dagkong mamsa ang iyang gisungag sa ngalan sa balaod.

Di sab mabayran ang opisyal og salapi. Kini subay sab sa iyang pagbutyag nga dugay na siyang gitental og salapi sa mga Parojinog aron nga molukmay kanila.

Apan wala siya magpasilaw niini ug gibuhat niya ang angay niyang himuon isip tinugyanan sa balaod.

Kon ingon pa kang Espenido ang tanang mga opisyal ug sakop sa kapulisan, kinsa pa may molahutay nga mga kriminal ug ilegal nga druga sa atong katilingban?