Compio: Sa lahi nga kalibutan...

Jeepy P. Compio

NABAG-OHAN ko sa miaging mga adlaw ug daw misulod ko sa kalibutan nga puno sa pantasya sa pagkaon; nahitabo kining tanan dihang nag-maternity leave ang kauban nako sa trabaho nga nia sa maong beat maong wala koy nahimo, ako ang mi-cover.

Sa kadiyot gibiyaan ko una ang kalibutan sa pag-cover sa krimen, pero naglisud ko og adjust, kay una ko miabot sa restawran nga akong-cover-ran, gikan ko nag-cover sa usa ka shooting incident.

Nadala pa sa akong hunahuna sud sa restawran ang mga dugo nga akong nakita sa crime scene ug misamot nga daw nagtan-aw nalang ko sa pagkaon nga gi-serve, pero mingkaon gihapon ko kay gigutom naman.

Pero una niana, pagsulod nako sa restawran, mura'g gisugat ko og surprisa sa mga bloggers, vloggers, ug sa akong mga kaubanan sa print media nga naga-cover niini nga beat.

Naghugyaw pa sila sa akong pagsulod kay una sab nila nga higayon nga dunay nakauban nga anaa naka-pokus gayud sa crime beat, ug nahisgutan sab ang mga lingaw nga mga headline ning mantalaan nga SuperBalita.

Bisan pa og pipila kanila wa nako mailhi, pero nakaila sila nako kay ang ilang kalibutan nagsunod sab sa mga posts sa internet, kay ma-post man ang mga istorya nga mapatik ning mantalaan.

Una gikaon ang mga pagkaon, nalingaw sila'g piktyur-piktyur, mitindog sab ko'g mipiktyur sama sa ilang gihimo; ug tuod man nahimo nako ang pagmantala sa akong mga hulagway sa pagkaon apan nalisdan ko'g unsaon pag-jamming sa pagsuwat og artikulo nga mahulagway nako sa readers ang kalami sa mga putahe - apan nahimo gyud nako.

Sa misunod nga mga adlaw, ming-chat na sab si SunStar Davao Lifestyle contributor Jinggoy Salvador nga naa say restawran nga among i-cover, ug magkita mi alas 11 sa buntag.

Dako akong reply nga yes, aron maanad ko, kay gawas sa makat-on ko, maka-paniudto pa ug maka-save na, apan naunsang pagka-unsaa, nga padung na unta ko sa lugar nga among abtanan, diha koy nadawat nga impormasyon nga dunay natigayong tulo ka shooting incidents nga maoy nahimong headline pagka-ugma.

Misabot nalang gayud si Jinggoy ug nahukman namo nga daghan pa og next time sa pag-cover og food pero ang hitabo sa shooting incident, daklit ra ug dugay na sab kaayong masundan.

Maayo lang unta sa una pa nga nagdasok pa ang mga adik sa Davao City kay mag-mug-ot ang adlaw og walay mamatay, pero karon sulagma nalang kay nahurot naman ang dautang tawo sa dakbayan.

Dihang nanumpa nako nga di nako mokaon og dinugoan human ko nag-cover tuig 2016 sa Catalunan Pequeño Massacre nga dunay upat ang namatay ug nakita nako ang pag-apul-apol sa mga dugo sud sa usa ka balay, gikumusta na sab ko sa usa ka plato nga dinugoan sa akong pag-cover sa restawran.

Ug kining tilawan lagi diay aron mahulagway sa artikulo ang gi-cover nga pagkaon, mitilaw ko ug kay gilamian ko sa luto nga dinugoan sa Rekado Restaurant, daw mura'g ako ang nakahurot sa usa ka platong dinugoan.

Naingon nako sa kaugalingon, nga kaya nako kini, bisan pa og duguon akong mga gipang-cover sa crime beat, panlimbasogan nako nga pag-abot sa mga pagkaon, ibutang nako akong kaugalingon nga daw wala ray nahitabong krimen sa palibot.

Sama sa gibutyag sa Davao City Police Office nga malinawon ang dakbayan bisan pa og sa wala pa nadeklara ang Martial law sa Mindanao.