Editoryal: Panahon ra ang nasayud

SAMTANG nanghasi ang mga teroristang Maute group sa Marawi City, nia poy mga rebeldeng New People's Army (NPA) milawgaw sab og ilang kaugalingon opensiba batok sa kagamhanan.

Tungod niini, natunga ang pagtagad sa mga sundalo sa pagpakig-away sa mga terorista ug mga rebeldeng komunista.

Mao bitaw nga mihangyo unta to si Presidente Rodrigo Duterte sa mga komunista nga di una molawgaw aron nga makatutok og maayo ang tropa sa kagamhanan sa krisis sa Marawi.

Hinuon, di man gayud makalaum ang gobyerno nga mopahuway una ang mga komunista, kay mao man pod ang ilang ampay nga magsinamok ning panahona kay linga ang mga sundalo didto sa Marawi.

Gipahimuslan nila ang higayon kay mas nakabentaha sila kay tunga ang atensiyon sa militar.

Kini ang nahitabo karon sa Davao Region kon diin dunay pipila ka probinsiya ang gihasi sa mga rebelde.

Niadtong milabay nga semana nakigbakabakay ang mga sundalo batok NPA didto sa Compostela Valley Province, kon diin walo ka mga rebelde ang napatay.

Niadtong Sabado, lain sab nga engkuwentro ang nahitabo tali sa kasundalohan sa 28th Infantry Batallion batok sa 40 ka mga rebelde nga giingong ilawom sa Southeastern Committee 18 ug Pulang Bagani Command 6, pangulohan ni Alyas Do ug So Kirantik, sa Marayag Village sa Lupon, Davao Oriental.

Wa hinuoy gitahong nakalas sa giyera apan ang hitabo nakahatag og tumang kahadlok sa mga molupyo sa dapit ug nagkatibulaag kay basin uroy og maigo sa mga saag nga bala.

Nagtinguha man unta ang gobyerno nga makigsabot sa liderato sa komunista, aron nga mahatagan na og sulbad ang 50 anyos nang pagpakigbisog apan gisuspende una kini kay di lagi mosanong ang mga NPA sa mga gikasabutan sa ilang mga lider ug sa kagamhanan.

Hinungdan nga di malikayan nga duna gyuy mga giyera nga mahitabo kay di man puwedeng pasagdan na lang pod sa gobyerno nga manghasi ang mga rebelde.

Busa maglaum kita nga dugang pang mga giyera unya ang mahitabo tali sa militar ug NPA.

Kon kanus-a kini matapos, panahon ra ang nasayud.