Genoguin: Pagtinabangay panahon sa kalamidad

Al Genoguin

KALAMIDAD nga mugna sa tawo ang nahitabo karon sa siyudad sa Marawi diin gawas sa mga sundalo ang nangamatay sa giyera batok sa mga teroristang Maute, ubay-ubay usab sa mga sibilyan ang nangapagan.

Gipaningkamotan sa atong Pangulong Rodrigo Roa Duterte nga matapos na unta kini sa dili pa moabot ang State of the Nation Address (Sona) karong sunod Lunes, Hulyo 24, pero wala mopasalig ang mga opisyal sa atong kasundalohan tungod kay ang engkwentro karon sa Marawi, dili face to face, kundi sniper batok sniper.

Daghan nang mga sibilyan ang milayas gikan sa Marawi City. Sakit man sa ilang buot nga biyaan ang ilang dapit diin tua ang ilang panginabuhian, apan pilit silang mobakwit aron pagsalbar sa ilang kinabuhi.

Atong nahinabi si Governor Dauglas Cagas sa Probinsiya sa Davao del Sur, naningkamot siya nga makatabang sa mga bakwiter gikan sa Marawi nga
karon anaa nagtapok sa Iligan City.

Niadtong milabay nga adlaw'ng Sabado, pinangulohan ni Provincial Administrator Marc Cagas, kuyog ang pipila ka mga kawani sa probinsiya gihatud
niya sa Iligan City ang tabang gikan sa probinsiya sa Davao del Sur.

Kini naglangkob sa mga sinakong bugas, noodles, mga sapot, de latang sardinas, ug daghan pa nga mikabat kapin P1 million ang kantidad.

Ang nasangpit nga kantidad wala nagagikan sa panudlanan sa probinsiya sanglit bawal man nga hilabtan ang pundo sa maong lalawigan, ang maong salapi gikan sa mga kawani sa probinsiya nga nagtinampuhay, mga katawhan sa Davao del Sur ug labaw sa tanan usa ka sweldohan ug allowance ni Governor Cagas iyang gidonar sa mga biktima.

Udto nang nahiabot si Administrator Marc Cagas sa Iligan City ug gabii nang nahibalik sa Digos human gihatud mismo sa mga biktima ang tabang gikan sa lalawigan sa Davao del Sur.

Pagtinabangay panahon sa kalamidad, mao kini ang hiyas natong mga Pilipino nga wala sa uban, tungod kay giila nato nga magsuon ug pamilya kitang tanan sulod sa usa ra ka nasud.

Manghinaut kita nga matapos na unta ang kagubot sa Marawi mugna sa mga dautang tawo ning kalibutan nga way tumong alang sa kalambuan sa atong nasud.

Hinuon masaligon kita sa katakus sa atong presidente nga malampasan niya kining pagsulay ubos sa iyang administrasyon, tungod kay suportado pa siya sa mga katawhang Pilipino, alang sa pagbag-o sa atong sistema.