Editorial: Signboard gidili sa PUJs

NAGKADAIYA ang reaksyon sa katawhan sa pagdili sa mga public utility jeepneys (PUJs) nga magbutang og signboard sa ilang destinasyon.

Kagahapon, dunay mga dyip nga wa nay signboard apan duna pay pipila kanila nga duna niini.

Tungod kay nabag-ohan, daghan ang nagyawyaw sa social media labot sa maong balaod tungod kay alang nila wa na mamao ang Anti-Distracted Driving Act.

Apan sa mensahe ni Eleanor Calderon, Operations Division Chief sa Land Transportation Office XI (Davao Region), iyang giklaro ang hinungdan sa pagpatanggal sa mga signboard sa dyip.

Suma sa opisyal nga di apil sa Anti-Distracted Driving Act ang signboards. Kadto lamang cellphones ug ubang gadgets ang apil sa maong balaod.

Dugang niya nga dunay gitawag nga line of sight sa drayber sa windshield ug ang mga signboards nabutang sa line of sight nga mahimong makasamok sa panan-aw sa drayber.

Tungod niini, suma niya, ilang giabisohan ang drayber nga kuhaon kini.

Gipasabot sab niya nga gidili gyud ang signboard sa pampasaheroang dyip sanglit duna na may marka nga rota ug mga agian nga dalan sa kilid sa dyip.

Giingon nga dunay tolerance sa pagkakaron sa signboards nga di mosobra sa 4 ka pulgada gikan sa dashboard apan hinay-hinay nilang gibugnaw nga di mogamit sa signboard.

Pahimangno sa opisyal nga kalapasan kini sa kondisyones sa prankisa ug di sa Anti-Distracted Driving Act.

Sa pagkakaron, di una nila buot nga pakalitan ang mga drayber mao nga nag-abiso lang una sila.

Alang natong mga katawhan, kung unsay makaayo kanato, ato lang sundon ang balaod kay way bisan usa nga mas labaw sa balaod.