Talento: B.O.

Majal Talento

HELLO, mga higala, musta dinha?

Sa tanan nga nagrasyahan pa og gininhawa karong adlawa, pasalamati dayon ang Diyos nga tinubdan sa gahum ug gugma.

Daghan man og hagit ang pamuyo nato dinhi sa kalibutan, padayon lamang kita og ginhawa, higala, kay dili mahubsan ang Ginoo sa grasya aron makalahutay ug magmadaugon kita.

"Body Odor" kun "b.o.", sosyal paminawon sa iningles apan sa binisaya, "baho sa lawas" kini. Ato ning hisgutan tungod basi'g adunay pipila nga wala nasayod nga aduna sila niining kondisyona.

Sa pagkatinuod, bahu-baho pod baya ning inyong miga bisan magsinimhutay pa kita-yaks! Bitaw, kaliwat sa akong papa ang pagkasingtanon mao dali ra kaayo mi mangaslum. Walay problema sa mga banidosa (arte) kay taud-taod mag-ilis, mare, apan kaming mga tapulan...ambot na lang!

Akong mama, ninglampas saysenta na ang pangedaron apan wala pa sukad nakagamit og roll on (deodorant). Ambot nganong dili man siya daling mangaslum. Kaming anak, apil apo niya, gikan sa ulo hangtud tiil kinahanglan gayud adunay ihidhid aron dili manampung ang naglingkod sa among kilid.

Ang baho sa lawas anaa sa mga mananap ug tawo, ug bisan sa tanum, migo. Ang kabaho niini mahimong naimpluwensiyahan sa daghang mga butang (pamatasan, genetics, sumbanan, survival mga pamaagi) apil na ang nagkalain-laing mga sakit ug sa psychological nga mga kahimtang.

Gikan sa atong ulok este ulo hangtud tumoy sa kumagko mahimong mubaho, migo, ilabi na kung magdinamak o tinapulan kita'g kaligo. Sa pagkatinuod, walay baho (odorless) ang singot apan kung piyestahan kini sa mga kagaw ug bakterya mao kini na ang magpabaho, higala.

Sama nako nga tabian apan kusog kaayo mohabhab og hilaw nga ahos ug sibuyas; apektado gayud akong ginihawaan ilabi na kung sa mga kaon-kaon ang akong toothbrush ug tooth paste makalimtan. Dili gayud madala sa alimugmug lang, magtak-um na lang aron dili biyaan sa kauban (joke lang!).

Bitaw, simpleng hygienic practices lang atong kinahanglan buhaton, ug dili na kinahanglan mogasto og dako, igsuon. Una, ligu-ligo usa o duha ka beses matag-adlaw aron sa atong katapad dili ta maulaw.

Ika-duha, baon-baon ta'g alcohol kung kita singtanon aron bag-o pa mangaslum, nakawisik-wisik na kita'g pangontra. Sa sama nako nga ganahan sa mga pagkaon nga bahu-bahuon, magbalon og toothbrush ug tooth paste pirmi kay maglimpyo ta sa baba nga pinahipi. Ingkaso'g naa kitay mahalukan- dili pod sila makuyapan. Pagpalit pod og daghang bubble gum ug mint candy kay pang-alalay, mare.

Sa ilok, puwede ra god limonsito o dinukdok nga linghod nga dahon sa bayabas, bro, kung walay pampalit og deodorant. Ilis-ilis pod ta kung ang atong bisti sa singot nabasa-basa. Pagdala og pulbos ug trapo aron from time to time ang imong lawas imong malimpiyohan.

Sa maong mga pamaagi siyaro'g manimaho pa kita no? Sunod dili na kita mailhan tungod sa "body odor" dapat sa "byutipul olweys," he he!