Compio: Feymous

Jeepy P. Compio

USA ka higayon niana mora'g mibalik ko sa katuigan sa akong pagka-ten-edyer, sa akong pagka-bagets, kay nauban ko sa panon sa giingong mga "feymous" ang ilang gitawag nga famous ug ilado sa social media ma-Facebook man, Twitter, ug sa Instagram.

Diha ko'y amiga nga magtutudlo. Gibisita nako siya sa iyang klase sa Grade 7. Ug kay sipat kaayo ang mga estudyante sa ingon niini nga level, kalit midagan ang estudyante ug iyang giingnan, "sulod, naa pa ko'y kaistorya, mosibat ka ha, sulod, feymous ka? Pila imong like sa Facebook?" nikatawa ko, mitakiki sab siya.

Nahisgutan dayon namo ang feymous ug iyaha kong gipasabot nga ingon niini ang ispeling sa famous, "feymous" sa mga hashtag sa social media, ug kung daghan og likes ang post, feymous daw kung tawgon.

Ingon ko, "mao ba? Na hala, magpa-feymous ta," nangatawa mi, ug misapaw og ingon ang estudyante sa iyang titser nga, "sir, feymous god ka, kay daghan kaayo kag-likes, moabot og tag 1K."

Nahimuot akong hunahuna bisan og pauli nako, kay nadungagan akong kaalaman sa kinabuhi karon sa kabatan-onan, sa kinabuhi nilang mga feymous.

Di lang kini, nasayran sab nako subay sa akong pakig-uban sa mga feymous sa among dapit sa Boulevard ug sa Bankerohan sa Davao City nga ang mga nag-edad diay karon og 10-anyos ngadto sa 17-anyos sila kadtong mga kabataan nga nagpauso sa pulong feymous sa social media.

Feymous ka kung matawag kung maka-relate ka sa mga Neon colors sa Hawk Bag; kung nagasuot ka'g jogger pants; nakasuot og Vans nga sapatos padung sa mga Eye ball (EB) o di kaha padung sa foam party.

Nagpauso sa mga sign sa hashtag (#) sa mga post nga maoy resulta sa tag 500 hangtud 2K nga likes, dunay daghang followers sa tweeter ug Instagram ug dunay magpa-fan sign.

Sa Davao City, diha koy mga feymous sab nga mga higala, ug gani sila kadtong mga batan-on nga daw mora'g pop corn nga niawas sa sudlanan nga mahulagway sa ilang pagsakay sa payong-payong nga magpunsisok, mag-strolling padung sa EB, or padung sa ilang giingong Champaca Street sa Phase II sa Sandawa.

Sila sab ang nagtukod sa giingong Champaca Babies ug f----ng friends nga gipangunahan ni Jeyo ang ilang founder nga taga Isla Verde.

Sikat kaayo sila, ug sadya kaayo sila kung magkitaay, daw kini ang sumpay sa ilang kinabuhing bata nga dula, kaon, tulog lang ang himuon.

Kagahapon, nahisgutan namo ni Police Senior Inspector Liza Ramirez, hepe sa Women and Children's Protection Desk (WCPD) sa Davao City, ang isyu sa kabataan nga anaa sa children in conflict with the law (CICL), diin iyang giingon nga kinahanglan anaa gayod ang dakong papel sa ginikanan sa pagmatuto sa ilang mga anak aron di kini mahisalaag sa dautang dalan.

Gibutyag sa opisyal nga sagad anaa sa CICL kadtong mga bata nga pinasagdan sa ginikanan nga bisan sa tungang gabii naa pa ang ilang mga anak sa gawas.

Natingala bitaw ko, sagad sa akong mga nakaila nga feymous, naa pa sila sa kadalanan magtapok, magsige'g chika hangtud maabtan og kaadlawon.

Sa akong, mga higala, lami bitaw ang magpa-feymous pero kinahanglan nga sa husto nga oras naa na ta sud sa atong mga balay. Sikat kaayo ta kung tawgon nga feymous, labi na og himsog ta kay sayong natulog ug nalikay pa kita sa tentasyon sa dautan.