Genoguin: Walay numero sa Kongreso

Al Genoguin

USA lang ka pamilok hagsa ang gihagoan nga impeachment dala sa mga oposisyon batok sa atong Presidente Rodrigo Roa Duterte, tungod walay igong gibug-aton ug gibasihan ang maong reklamo.

Pulos mga hinagdawan nga balita ang nahipus nga impormasyon ni Magdalo Congressman Gary Alejano nga maoy nagduso sa impeachment batok sa atong presidente.

Dili nato mabasol ang sundalo nga nahimong congressman sanglit dili abogado ug walay kabangkaagan kon balaod ang hisgutan, apan bisan pa kon adunay gibug-aton ang iyang reklamo, ang wala niya makita nga wala silay igong numero aron makalusot ang impeachment sa Kongreso.

Si Congressman Edcel Lagman sa Albay, abogado ug beteranong magbabalaod apan wala makatambag sa iyang mga kauban nga dili na maghago og panahon sanglit nasinati na kini niya niadtong sila pa ang majority sa Kongreso panahon ni kanhi Presidente Gloria Macapagal Arroyo - Wala makalusot ang upat ka impeachment sa katarungan nga walay numero ang nagreklamo.

Gutom lang ang mga oposisyon karon mao gusto nilang maputol gilayon ang bag-ong administrasyong Duterte, tungod kay ang unang gihatagan og gibug-aton sa kampanya, kurapsiyon ug druga.

Kon may ulaw pa ang mga yelohan, sobrang pangungurakot ang nahitabo sa ilang panahon, nga karon buot imbestigahan sa administrasyong Duterte sama sa Priority Development Assistance Fund (PDAP) ug Disbursement Acceleration Program (DAP).

Lisud pang banggaon ang Duterte administrasyon kay gipaluyohan sa mga masang Pilipino. Bisan sa mga survey nga gihimo, excellent pa gihapon ang iyang rating, tungod kini sa iyang bag-ong estilo sa pagpalakaw sa bag-ong gobyerno, nga pabor sa mga pobreng Pilipino.

Pero unta, Mr. President, dili maghinubra, kay atong nakita nga ang mga pobre, dili na morespeto og balaod, mangilog na og mga balay nga dili ila, kay lagi gidapigan sila sa atong pangulo.

Nasabtan nato nga maluluy-on ang presidente, pero dili nato lapason ang balaod tungod kay nagsunod kita og balaod. Ang para kang Pedro, ihatag kang Pedro, ug ang para kang Juan, ihatag kang Juan.

Balik sa kaaway ni Presidente Duterte, hulata ang inyong panahon, kay taas pa ang panahon sa bag-ong presidente sa masa, nga gihatagan og pagtagad ang mga pobreng Pilipino nga wala tagda sa milabay'ng pangulo.