Dura: Molampus kaha sila sa ICC?

HUMAN gibasura sa House Committee on Justice ang impeachment complaint nga gipasaka ni Magdalo Representative Gary Alejano batok ni Pangulong Rodrigo Duterte, milutaw karon ang hugon-hugon nga posibleng modangop na ang kampo sa Kongresista sa International Criminal Court (ICC).

Kini ang gidudahan sa pipila tungod kay nagtuo sila nga di gayud mohunong ang mga kritiko sa Pangulo hangtud di siya mapalagpot sa Malakanyang.

"Yeah, he can go ahead. He is free to do it. This is a democracy,” suma ni Pangulong Duterte, kinsa wa nipakita og kahadlok sa iyang mga kritiko.

Ang Pangulo giakusahan nga responsable sa multiple murders ug crimes against humanity sa pagsagop sa polisiya sa estado sa pagdasig sa kapulisan ug vigilanteng grupo nga mopatay sa giingon nga kapin 8,000 ka mga gikatahapan nga drug users ug dealers.

Giakusahan sab siya sa sala nga corruption, di maesplikar nga bahandi, ug ang bugnaw nga baruganan sa pag-angkon sa teritoryo sa nasud nga giilog sa China.

Apan ang maong reklamo giingon sa Committee on Justice nga supisyente sa porma apan di supisyente sa unod mao nga ilang gibasura.

Wa pa kita masayud sa sunod lakang ni Rep. Alejano mao nga di kita makaseguro kung mopasaka ba siya og kaso sa ICC nga maoy katapusan niyang kadangpan.

Sa laing bahin, ang pagbasura sa impeachment complaint sa Kongreso maoy gipaabot nga tiyempo sa kampo ni Atty. Jude Sabio nga unang miduso sa ilang kaso sa ICC.

Nagtuo sila nga kini na ang panahon nga dawaton ang ilang kaso batok sa Pangulo sa ICC tungod kay nahimo na ang tanan nga paagi dinhi sa Pilipinas apan miguwa nga pakyas tungod sa impluwensya hepe ehekutibo.

Ug kon mahitabo nga makita sa ICC nga dunay igong hinungdan nga taralon ang Pangulo, madugang na unya siya sa mga opisyales sa gobyerno sa ubang estado nga dunay kaso sa internasyunal nga hukmanan.

Apan subay sa Facebook post sa mga netizens, ilang giingon nga way angay kabalak-an ang Pangulo tungod kay way kamatuoran ang pasangil ni Sabio.

Ug kon atong basehan ang pahayag sa Pangulo, segurado siya nga nahisubay sa balaod ang iyang kampanya kontra druga bisan pa man sa pagsaway sa mga sakop nga nasud sa United Nations.

Daghan ang nagsulti nga bakak ang alegasyon sa mga kritiko sa Pangulo. Busa, kon kinsa man ang nagbakak nila, ato lang hulaton nga mahugno ang bakak sa iyang kaugalingon nga gibug-aton ug ang kamatuoran ang magmadaugon sa umaabot nga panahon.