Talento: Werlalooo

Majal Talento

HELLO, mga sis ug bro! Hastang inita gayud karong summer no? Halinon kaayo diri sa among dapit ang mga ice candy, halo-halo ug ice buko aron pabugnaw sa gibati, migo.

Segurado ko nga daghang maka-relate kaninyo niining bag-ohay pa lamang naeksperyensahan nako. Nakasabot ba kamo sa pulong nga, "werlalooo?" Wala kini sa diksyonaryo. Ginama ra kining pulonga sa mga tawo nga adunay kiat nga panghuna-huna.

Gikan kini sa pulong nga, "werla" o "naglibog," miga. Kanang wala na natunong sa husto ang pangutok, migo. Mao pod kini ang nasinati nako niadtong Huwebes diin daghan kaayong importanteng buluhaton ang gisalig kanako sa akong amahan, igsuon, apan naunsa bah nga wala man intawon ko ningtunong.

Gikan sa eskuwelahan nga gi-enrolan sa akong anak, bitbit nako ang salapi, tseke (salapi gihapon nga puwede papulihan ni bisan kinsa pinaabtik sa bangko kay "CASH" ra nakasuwat, migo hu hu). Gisulod man god nako sa dakung sobre ang mga importanteng dokumento sa anak nako kay magpa-enroll lagi. Gisuksukan nako og credit card ug bag-o kaayo nga ATM card sa akong Papa diin apil pa ang Personal Identification Number (PIN), miga, kay pailisdan og PIN sa akong amahan, miga.

Sa pagpaneguro nako nga safety ang mga dala nako, gibutang nako sa dakung paper bag uban ang duha pa ka bagahe kay mobiyahe ko sa dakbayan sa Dabaw, mare. Sa dihang nakalakaw na ang pedicab nga gisakyan namo sa akong anak, akong gikuot ang sobre nga gisudlan sa mga gamit ug dokumentong importante -- UG NAWALA AS IN NAHANAW KINI.

Sa kakulba daw mora ko'g maka-ihi. Siyempre, sa akong Papa kadtong mga butanga mao "nawerlalooo" o nagsalimuang kadali ning higala ninyo hu hu! Tungod naay kapin dos mil nga cash ug dos mil pod nga tseke (gawas sa ATM ug Credit Card); nawad-an na ko'g paglaum nga mabalik pa ang mga matanga sa akoa nga nagtinanga.

Sakit man ug ulaw angkunon, hasta nakong danghaga niadtong adlawa, igsuon. Bisan wala ko gikasab-an sa akong Papa --grabeng kaulaw ang gibati ko bah!

Anyway, nag-ampo lang ko'g una kay Lord kay wala man laing unang buhaton ug duolan kon dili ang atong Labaw'ng Magtatabang. Gipakansela dayon nako sa bangko ang ATM ug Credit Card sa Papa nako aron walay makapang-abuso.
Nanawag ang guwardiya sa eskuwelahan, nag-text brigade ug facebook chat ang mga higala nakong mga inahan kay gihatud sa usa ka pedicab driver ang sobre nga nawala nako.

Matud pa niya, wala na kunoy kuwarta. Wala na lang pod ko nagdahom. Nagpasalamat na lamang ako nga adunay nabalik nga dokumento kanako.

Segurado ko nga nag-amping ko apan wala gayud napugngan ang maong panghitabo. Lesson learned? Mosipyat gayud ta, migo, bisan unsaon nato'g paneguro. Ang kuwarta, makita ra apan ang malasakit sa akong mga higala, dako kaayo'g kahimoan nga nakapagaan sa akong dughan.

Salamat kaayo kaninyo, Momshies. Ang akong pagkawerla sa pag-ampo ra nako gidala. Grasya ni Lord, naulian na dayon ko, higala. Human imperfections… haaay!!!