Compio: Ang misteryosang si Lucia Joaquin

Jeepy P. Compio

NAGPADAYON karon ang istorya ni Lucia Joaquin sa social media ug padayon kining gibalot og misteryo.

Daghan ang nagsulti sa Facebook nga tinuod ang giingong babaye sa takna kon "woman of the hour" nga kung imoha kining i-add, dayon iyaha kang ma-accept, unya mo-chat na ka niya, mabati daw nimo ang pagpanlibawot sa balahibo.

Hinuon wala pay makasulti kung asa siya gikan, taga asa siya, ug tinuod ba kini; hinuon daghan ang mibilib sa daw reyalidad nga pagpakaaron-ingnon sa nagpahipi sa persona o pagkatawo ni Lucia Joaquin diha sa pagpanghadlok hinungdan nga nag-viral kini.

Migula sa mga istorya sa nagkadaiyang website nga nagsugod kining tanan sa giingong usa ka reyalidad nga panghitabo sa kinabuhi sa batan-ong si Enzo Cruz.

Si Enzo Cruz usa sa mga nag-confess (mikumpisal) nga tinuod ang nahitabo kaniya, dihang daw gipukaw siya sa pagkahinanok aron mangihi, ug gibati niya nga daw di na siya katulog.

Nag-Facebook na lang siya, ug kalit dunay mi-chat niya nga wa siya kaila, dayon naghangyo nga magpa-picture kaniya, ug kalit migula ang piktyur nila ni Lucia Joaquin nga daw katupad lamang niya.

Maayo kung anyag kaayong babaye si Lucia Joaquin, kay maganahan kita makighigala ug makasalig kita bisan sa gamay lang nga takna sa pag-chat, pero unsaon man nga daw nakamaskara kini, hadlok og dagway nga gibalot og misteryo nga sagad mogawas aron maoy mopukaw sa atong pagkahinanok.

Didto nahuman ang istorya, pero ang misteryo nagpadayon gumikan sa pag-viral niini sa social media, nga maoy nahimong gikalingawan sa mga netizens sa pagpasa-pasa sa ilang mga kasinatian, pero ambot lang kung tinuod ba kini.

Mao ning karon, pag-open nimo sa Facebook, sugaton dayon ka sa mga post nga #LuciaJoaquin, #MagpakitaKa, #NalagotNakoNimo, #HumandaKa #AcceptMe, #NabuangNakoNimo #NahadlokNako ug daghan pang hashtags sa kasinatian sa mga netizens nga mikonektar sa karakter sa giingong Lucia Joaquin.

Diha say nag-ingon nga kita lang ang giatik sa social media, kay di lang sa misteryo nga dala ni Lucia Joaquin kun di daghan pang mga post nga gikuninitan sa Facebook niining henerasyon nga daw kita ang gimaneho sa teknolohiya.

Hinuon, kung tinuod kini, ug bisan bakak lamang ang tanan bunga sa mamugnaong imahinasyon sa naggama sa istorya, nakadani gihapon kini og pagtulun-an gumikan mahadlok kadtong mga bata, nga kinahanglan magbaton gyud og limitasyon sa pagkuri-kuri sa Facebook.

O di ba kaha, ang nahitabo bunga gayud sa impluwensiya sa teknolohiya diha sa kinabuhi sa tawo nga daw tingali'g pag-abot sa panahon, mabutang nga ang teknolohiya na ang mosugo nato.

Bitaw, mag-Facebook una ko, sulayan nako nga mag-friend request kang Lucia Joaquin. Basin diay i-accept ko niya, ug kung mahitabo kini, suginlan ko kamo sa sunod Sabado puhon sa akong kasinatian kaniya. Basin diay og tinuod kini nga istorya.