Genoguin: Andam mopatay ug magpakamatay

Al Genoguin

DAGHAN ang natingala ug dili motuo nga ingon niini ka iladong leader si Presidente Rodrigo sa tibuok kalibutan sa online social media survey.

Gisayunan ka nga gilupig pa niya ang Santo Papa nga si Francis, Bill Gates ug Canadian Prime Minister Trudeau.

Sa wala pa masayud kon kinsa gyud si Rodrigo Roa Duterte niadtong ika-duhang tuig sa iyang pagka-mayor sa Davao City, nagsugod na didto ang iyang pagka- popular sa tibuok Pilipinas.

Bulan sa Hulyo 1989 sa dihang nang-hostage si Felipe Pugoy ug mga kauban niini og mga relihiyusong grupo sulod sa Davao Penal Colony (Dapecol).

Gitanyag niya ang iyang kaugalingon nga maoy i-hostage kambiyo sa gipang-hostage nga mga binilanggo.

Niadtong Enero 1996 sa dihang gibitay ang pobreng katabang nga si Flor Contemplacion didto sa Singapore, atubangan sa City hall gisunog ni Mayor Duterte ang bandila sa nasud Singapore agi'g suporta sa pobreng katabang nga gipapatay.

Ang iyang pagpakighigala sa mga grupo nga kaaway sa gobyerno, ang armadong sakop sa rebeldeng komunistang New People's Army (NPA), kini nagbunga og maayong resulta tungod kay siya mismo ang moadto sa mga kampo sa mga rebelde, aron buhian ang mga sundalo ug pulis nga gihimong prisoner of war.

Nabaniog kini, dili lang sa isla sa Mindanao kon dili sa tibuok Pilipinas. Sa iyang pagka-mayor sa Davao sulod sa 22 ka tuig, walay pugong-pugong mogasto og salapi sa panudlanan sa dakbayan alang sa mga pobreng mga tawo nga nagkinahanglan og tabang.

Tinukmod sa iyang kapalaran nga mahimong leader niining atong pobreng nasud sa Pilipinas, midaug sa pagka-Presidente sa milabay'ng piniliay.

Bisan kon gitabangan og bukbok sa mga isyu ug komentaryo sa iyang kaaway sa politika, sa tanang mga ahensiya nga nagpahigayon og survey, kanunay tag-as ang iyang ratings.

Nganong gilabwan ni Presidente Duterte sa pagka-popular ang mga dagkong leader sa tibuok kalibutan?

Sayon ra ang tubag, tungod sa iyang pagka-talagsaong leader, ang pagbanaw sa dugo sa mga dautang tawo nga naigo sa kampanya batok sa ginadili nga druga.

Labaw sa tanan, ang iyang pagpamalikas "putang In...," atubangan sa mga dignitaries sa bisa'g unsang okasyon.

"I will kill you." Sukad sa mga kasaysayan sa mga dagkong leader sa tibuok kalibutan, nakadungog ka ba og presidente nga mamalikas? Wala no?

So, mao kini ang estilo nga dili angay usbon sa atong presidente, kay ang iyang pagpamalikas, adunay gipaburan nga buot ipasabot, nasuko sa mga dautan aron paburan ang mga maayong tawo sa katilingban.

Siya ang matang sa presidente nga andam mopatay ug magpakamatay sa ngalan sa katarung ug kaangayaan.

Siya ang ikaduhang presidente sa masa kon diin ang una mao si kanhi Presidente Ramon Magsaysay.