Editoryal: Away batok terorismo

DI IKALIMOD nga padayon ang hugot nga operasyon sa militar batok sa mga Abu Sayyaf, ug uban pang grupo sa mga terorista nga naglihok dinhi sa Mindanao.

Sukad nga gilutos ang mga nahisgutan tungod sa pagpangdagit, pagpanglunggo og ulo sa ilang mga bihag, ug pagpanghasi, daghan nang mga sakop sa teroristang Abu Sayyaf ang napatay.

Sa pakiggubat batok kanila, di sab malalis nga dunay mga kinabuhi sa mga sundalo ang makalas, apil na mga sibilyan.

Apan ning uwahing mga adlaw, mora og wala magpalupig ang mga terorista human gitaho nga ang Abu Sayyaf, nakig-abin og puwersa sa ubang grupo sama sa Maute Terror Group ug Bangsamoro Islamic Freedom Fighters (BIFF).

Ug sumala pa, mga nahisgutan nagtigum ug nagplano nga mamomba sa nagkadaiyang mga dapit sa Mindanao.

Gani daghan ang nabalaka nga kadtong mibusikad nga duha ka bomba didto sa Tacurong City bag-ohay lang, kabahin kadto sa maong plano.

Hinuon, ang awtoridad wala pay tin-aw nga pahayag sa maong taho ug padayon pa ang gihimong imbestigasyon sa bomba nga mibusikad nga miangol og daghang mga tawo.

Ang away batok terorista, di lang away sa tropa sa gobyerno, apan away usab natong mga yanong mga molupyo. Kay sa pagpakiggubat batok terorismo, mahimong kabahin kita unya sa mamahimong collateral damage.

Duna man tuoy grupo sa mga terorista ang gitumbok, apan wa silay dagway nga puwede natong mailhan aron nga kita makalikay kanila.

Busa di kita mokompiyansa ug kanunay nga magbinantayon kay mga terorista way gipili nga biktimahon.

Itaho gilayon nato ngadto sa mga awtoridad ang mga tawo o butang nga kadudahan sa atong palibot aron nga mapakgang gilayon ang bisan unsang dautang plano sa mga kaaway sa kagamhanan.