Dura: President Duterte gimahal sa mga langyaw

NAGLUKSO-LUKSO sa tumang kalipay ang mga Dabawenyo dihang nasayran nila nga nanguna si Presidente Rodrigo Duterte sa Time magazine's readers' poll alang sa tinuig nga listahan sa 100 nga labing implwensiyado nga tawo sa tibuok kalibutan.

Usa sa libuan ka mga Dabawenyo nga nalipay mao si Davao City Councilor Bernard Al-ag kinsa nagsulti nga mapasigarbuhon siya sa atong pangulo.

"Who would have thought that a leader from Davao City would be one of the world's most influential people? I am very proud of our president. He is an inspiration (for me) to be a better leader," suma ni Al-ag.

Sa samang higayon, si Davao City Tourism Officer Generose Tecson nagsulti sab nga nalipay siya sa maong balita.

"I am very happy and proud that Duterte won the Times poll as one of the most influential persons for 2017 and at the same time I feel amused that it had to be Times magazine," suma niya.

Suma sa artikulo nga gipublikar sa Time niadtong Lunes, si Duterte milabni sa singko porsyento nga "yes" votes dihang gitapos ang botohay Dominggo sa gabii, Abril 16.

Ang pangulo nanguna nila Canadian Prime Minister Justin Trudeau, Pope Francis, United States billionaire Bill Gates ug Facebook founder Mark Zuckerberg, kinsa duna lamay tag tres porsyento nga total "yes" votes.

Sa akong Facebook post, usa sa mga netizens nagsulti nga magsakit na sab ang dughan sa mga anti-Duterte sa maong balita.

Natural nga magsakit ilang dughan tungod kay ang tawo nga ilang gitamay pag-ayo, mao may giila nga labing implwensiyadong tawo sa kalibutan.

Sa akong nakita, daghan ang nakadayeg sa pangulo tungod sa iyang kampanya kontra druga nga gipaboran di lang sa mga Pilipino kundi apil na mga langyaw.

Usa na kanila ang among higala nga si Malcolm Conlan, taga London, United Kingdom, nga mianhi sa dakbayan sa Davao aron lamang makita ang lugar nga pinuy-anan sa pinangga niyang Pangulo.

Sa among pakighinabi kaniya niadtong Lunes sa hapon human sa iyang pagbisita sa Sun.Star Davao office, siya nagsulti nga gimahal niya ang Pangulo tungod kay luwas ang kabanay sa iyang asawa sa Pangasinan dinhi sa Pilipinas.

Dako ang iyang pagtuo nga nangahadlok na ang mga kriminal tungod sa kampanya ni Duterte.

Gawas pa niini, nakadayeg siya sa pangulo tungod kay dihang nasakit ang kabanay sa iyang asawa, libre na sila sa ospital.

Tungod niini, iyang gisaad nga depensahan ang pangulo sa Pilipinas bisan naa na siya sa United Kingdom pinaagi sa iyang Facebook ug website.