Roldan: Impeachment na pod?

Emmanuel C. Roldan

HAPIT siyam ka bulan na ang administrasyong Duterte busa inanay nga niguwa ang “destabilization plan.”

Human na ang gitawag nga “honeymoon period” diin ang kontra-partido sa nidaug nga pangulo dili mohimo'g kasikas batuk sa bag-ong administrasyon.

Kasagaran niini usa ka tuig human siya nilingkod apan tungod sa kapaspas sa panahon ug sa daghang nangaligsan sa palisiya sa presidente wala abti'g usa ka tuig ug naa nay gihikay nga impeachment complaint o ang sumbong sa pagpalagpot sa pangulo.

Kadto lamang mga opisyal sa gobyerno nga nakalingkod tungod sa batakang balaod maoy puwede ma-impeach sama sa presidente, bise-presidente, Supreme Court Chief Justice, Chairman sa Comelec ug Commission on Human Rights ug pipila pa. Nagmalampuson ang impeachment kaniadto nila Presidente Erap Estrada ug Chief Justice Renato Corona busa dili na kita matingala kung may susamang proseso pa kita nga masaksihan sa umaabot.

Niadtong niaging semana, nagpasaka og impeachment complaint ang representante sa Magdalo Partylist nga suod ni Senador Antonio Trillianes III batok ni Presidente Duterte.

Ubay-ubay nga kalapasan sa konstitusyon ug sa ubang balaod ang iyang gilista nga gihimo kuno sa pangulo mao nga kinahanglan siya nga palagputon sa puwesto.

Dako kuno siya'g tulubagon sa katawhan sa nagkuyanap nga pinatyanay sa iyang “double-barrel campaign” ug Operation Tokhang batok sa gidili nga droga.

Angayan daw nga manubag ang pangulo sa sobra 7,000 nga nangamatay ubos niining maong kampanya.

Nadawat na ang impeachment complaint sa lower house sa Kongreso diin maapil sa agenda sa Kongreso inig abli niini pag-usab sa Mayo kon mosugot ang House Speaker. Si House Speaker Pantaleon Alvarez ang magbuot kon iyang ibutang kini sa agenda nga tukion sa hawanan sa Kongreso.

Kung mahiapil, moadto gidayon kini sa usa ka kometiba sa Kongreso, posible sa “blue ribbon committee” aron maoy molantaw kon sakto ba kini sa porma ug unod unya mohimo'g kaugalingong taho nga debatihan sa plenary sa Kongreso ug kung maaprobahan, iduso ngadto sa Senado aron sila ang mohimo sa “impeachment proceedings.”

Sama sa nakita nato sa impeachment proceedings nila ni Estrada ug Corona, pangulohan ang maong proseso sa Supreme Court Justice ug ang tanang sakop sa Senado maoy mahimong hukom.

Kon madayon man kini, masaksihan na usab nato ang hataas nga mala-telenovela sa politika sa nasud. Sama ra ang isyu og paagi apan lahi lang ang mga personalidad nga istaring. Apan ang pangutana karon kon madayon ba kini?

Sa akong tan-aw, layo ra ni nga mahitabo sa pangulo. Kahibalo kita nga ang gahum sa politika anaa sa numero. Bisan nindot man ang isyu o programa nga imong gipakigbisogan, wala kini sangputan kon di mosugot ang mayorya sa politiko nga may awtoridad nga mohukom niini.

Gunit sa partido ni Presidente Duterte ang Kongreso hasta ang Senado busa buhaton nila ang tanan aron dili mapalagbot ang ilang pangulo.

Gani nibahad na karon si House Speaker Alvarez nga mopasaka usab og impeachment complaint batok kang Bise Presidente Leni Robredo sa pag-apil niini sa “destabilization plan” sa administrasyon.

Namulong si Robredo sa United Nations ug iyang gidaut ang programa ni Presidente Duterte. Resbak na kaha kini?