Roldan: Center Against Illegal Drugs (CAID)

Emmanuel C. Roldan

NAHUWASAN namo sa pagsaulog sa ika-80 nga Araw ng Davao? Para kanako, sadya apan mingaw ang pagsaulog nato niini. Bisan naay re-routing, di kaayo daghan ang nagpunsisok sa kadalanan. Kadaghanan tingali sa tawo tua nagtampisaw sa dagat ug nagbakasyon sa dugay nga holiday.

Congrats diay sa mga maanyag nga mananaug sa Mutya ng Davao ug nila ni Ma'am Amy Cabusao ug Sir Kublai Millan nga 2017 Datu Bago Awardees. Duha ra yata ang nakakuha karong tuiga.

Kadtong naghinamhinam nga makadawat niini, better luck next time na lang! Ug samtang nangandam ang siyudad sa Araw ng Davao, giablihan usab sa Ateneo de Davao University (AdDU) ang Center Against Illegal Drugs (CAID).

Sumala sa taho nga gikan sa atong higala nga si Carolyn Arguillas sa MindaNews nga si Arsobispo Romulo Valles mismo ang niabli niini.

Matud pa niya nga naghatag kini'g sinyales sa paglaum ug aksiyon sa mga kaigsuonan nato nga nalulon sa ilegal nga druga.

Kahibalo kita nga liboan na ang mga surrenderers sa Oplan Tokhang sa PNP sa tibuok nasud. Kadaghanan kanila mga batan-on ug kabus nga walay trabaho.

Dugang pod ni Fr. Joel Tabora, presidente sa ADDU nga kabahin ang CAID sa baruganan sa Archdiocese sa pagprotekta sa kinabuhi.

Adunay upat ka programa ang nasulod niini nga: Healing and Recovery for Drug Surrenderers (Herds), Drug Hotline and Referral Helpline, Mindanao Drug Trade Research, ug Human Rights Training and Rights-based Policing.
Gibanabanaan nga mokabat og 11,000 ka mga drug surrenderers sa Davao ug makaya rang tabangan sa CAID ang 3,000 kanila nga nahimutang sa 28 ka barangay sa dakbayan.

Di makaya sa CAID nga matabangan ang tanan busa nagkinahanglan pa kini'g ayuda gikan sa laing grupo.

Kauban sa CAID ang Archdiocesan Sagop Kinabuhi Program ug ang City Anti-Drug Abuse Council (Cadac) nga nakighinabi usab sa Basta Ikaw Lord (BIL) nga motabang sa rehabilitasyon sa mga surrenderers.

Alang kanako dako na kining tabang sa simbahan sa kampanya sa ilegal nga druga nga nagkuyanap sa atong katilingban karon.

Nindot kaayo ang plano sa CAID nga gawas nga matabangan ang mga surrenderers sa bisyo mahatagan usab og edukasyon ang kapulisan kabahin sa tawhanong katungod ug ang saktong pagpasunod sa balaod.

Daghan man god sa atong mga law enforcers nga nagtuo nga gamhanan na sila kay anaa silay pusil ug walay bili ang kinabuhi sa tawo sa kampanya sa ilegal nga druga ug kriminalidad.

Wa sila masayud nga kitang tanan, kriminal man o angel, adunay dignidad ug kinabuhi nga giprotektahan sa atong balaod.

Sakto na ang kapin 7,000 ka mga namatay sa extrajudicial killings (EJK) ug case under investigation sa paghatag og leksiyon sa mga tigpayuhot og ilegal nga druga.

Dili na nato pun-an ang sayop sa laing pang sayop, hinunua atong tabangan ang nalulon sa ingon niining bisyo.

Tugkaron sab sa gobyerno ang ugat hinungdan sa maong bisyo ug ang pagkunsabo sa anaa sa gahum sa illegal drug trade.

Puwede motawag sa CAID sa Hotline/helpline numbers: (082) 2986728, (082) 2986729, 09434944211 (Sun), 09121968535 (Smart) and 09563895131 (Globe).