Tambagi Ko Noy Tikyo: Nasakitan

DEAR Noy Tikyo

Good day! Itago ko sa ngalang Dorie. I'm 22 years old, nag-work isip medical representative.

Duna koy friend nga lalaki, as in suod kaayo. Pareha mi og trabaho apan sa lain siya nga medical nga company.

Malipayon ko kon magkuyog mi. Sa sige namo og uban, daghan na ang nakamatikod nga magsige mi og kuyog sa usa ka lugar. Natayming man god nga naasayn siya sa norte nga bahin, ug tua sab ang akong area.

Niabot ang higayon nga akong pagtan-aw kaniya labaw na sa higala tungod sa iyang pagkabuotan ug caring kaayo. Lahi ra siya sa ubang mga lalaki.

Basta magkuyog gani mi bisan unsa na lang ang among istoryahan. Apan wala gyud siya makahisgot kon unsa ang iyang feeling nako.

Usa ka higayon, nakit-an nako siyang dunay kaistoryang babaye sulod sa usa ka restaurant. Sa dihang akong gipangutana ang iyang kauban sa company unsay status sa lalaki, matud niya not applicable na tungod kay minyo na. Duna nay duha ka mga anak.

Nasakitan ko sa akong nasayran kay mas misamot na unta ang akong love niya. Unsa may akong himuon nga mingawon pa man ko niya kon di ko siya makita? Please help me, Noy.

Dorie

***

Dorie,

Kanang kasakit mawala ra na paglabay unya sa panahon ilabi na kon hingpit mo nang madawat ang nahitabo. Siyempre sa pagkakaron, normal nga masakitan ka kay duna ka may gibati nga gugma kaniya.

Apan para nako, angay ka na nga mo-move on niya. Ang kamatuoran nga imong nasayran, naghatag kanimo og higayon aron nga makalingkawas sa pagbati nga di na angay nga palambuon pa sa imong kasingkasing.

Pasalamat ka nga wala magpahimulos sa higayon ang lalaki, gani wala ka man mahibawo sa iyang status bisan og sige mo og kuyog. Nagpasabot nga wala siyay plano nga mangulitawo nimo tungod kay nasayud siyang duna na siyay kabilinggan sa kinabuhi.

Kon duna may miturok nga gugma sa imong kasingkasing para niya, angay mo na kining putlon kay bisan unsaon wa nay panahon aron nga magkarelasyon mong duha.

Dawata ang kamatuoran nga kutob ra sa friendship ang inyong panagsuod kay pinaagi niini dali ra unya kang maka-recover ug maka-move on.

Kanang kamingaw, normal ka na. Apan sa akong nang giingon, mawala ra unya kini paglabay sa panahon.

Noy Tikyo