Bulawanong regalo @60

PUNO sa kalipay ug kasadya ang birthday party sa tawo nga dunay dakong kontribusyon sa katawhan ilabi na sa mga senior citizens sa siyudad sa Davao.

Ang selebrasyon gihimo sa D' Leonor Hotel sa Bajada, Davao City, niadtong Pebrero 2 ning tuiga nga maoy ika-60 nga adlaw nga natawhan ni Ptr. Luis R. Moran.

Mitambong sa maong selebrasyon si Davao City Vice Mayor Bernard E. Al-ag, Office for Senior Citizens Affairs head Asucena Bajao, mga opisyales sa World War II Veterans of Davao City, pamilya, ug mga kauban sa trabaho.

Nahimong malipayon ug sadya ang birthday party pinaagi sa mga supresa nga gidalit sa kapikas ni Ptr. Moran nga si Mrs. Cecilia, mga anak nga sila Cristine ug Blessyl, ug mga apo nga sila Luigie Moran Obra ug Geoffrey Moran Obra Jr.

Sa programa, dunay sayaw nga gipasundayag sa mga kauban sa celebrant sa opisina sa OSCA ug Office of Councilor Victorio Advincula Jr.

Usa sa pinakabulawanon nga regalo nga nadawat ni Moran ang endorsement sa OSCA head nga siya ang mosunod nga Officer-in-Charge sa maong buhatan samtang himuon pa sa lokal nga gobyerno ang proseso sa pagpili sa mosunod nga OSCA head.

Si Bajao, dihang namulong, iyang gibasa ang unod sa iyang endorsement letter ngadto kang Davao City Mayor Sara Duterte-Carpio nga gipalakpakan sa pamilya ug mga bisita.

Sa pagpamulong usab ni Vice Mayor Al-ag, iyang gisaysay ang dedikasyon
ni Moran sa pagpangalagad sa mga Dabawenyo.

Sila Al-ag ug Moran kauban sa Davao Jubilee Foundation nga nag-atiman sa mga kabus, dunay deperensya sa panglawas, ug mga masakiton.

Tungod sa katakus ni Moran, suma ni Al-ag, iyang gisuportahan ang endorsement sa OSCA head.

"To our beloved Vice Mayor and OSCA head, thank you very much for your endorsement, trust and confidence," pahayag ni Moran.

Siya kanhi nag-alagad sa gobyerno sa panahon ni kanhi Presidente Ferdinand E. Marcos.

Nahimo sab siyang focal person for senior citizens program sa Office of Councilor Leo R. Avila III gikan 2001 hangtud 2010 ug karon sa OSCA Davao City.