Meditalk: Gusto magpa-tattoo (Part 3)

Dr. Fritz Espedilla

(Pasiuna: Kini ang atong apas-sumpay sa suliran nga gipadangat kanato ni Althea A. of Tibungco mahitungod sa iyang gusto nga magpa-tattoo, apan, medyo kabado lang siya.)

DEAR Althea A. of Tibungco,

Karon, ania pa ang lain nga mamahimong mga problema nga ihatud niining pagpa-tattoo. Anaa usab ang keloid. Kining keloid mao kining mga dapit sa peklat nga ningtaas gikan diha sa panit. Kana bitaw makit-an ninyo nga daw nagburot nga dagko kaayo nga gikan sa peklat nga mora og dagko kaayo nga ulod ang itsura? Mao na.

Mamahimo kini nga mosugod ilawom diha sa tattoo ug hinay-hinay nga mokalat dayon. Dili hinuon tanan maapektuhan niining keloid, kay anaa lang kini sa kaliwat ug kasagaran nga moapekto niadtong mga tawo nga medyo itumon og pamanit. Apan baya anaa na pod koy mga higala ug mga pasyente nga nakit-an nga anaay mga keloid nga puti man sila. Nagpasabot lamang nga dili basehanan ang kolor sa pamanit niining maong kondisyona.

Ang pagtambal niini mosugod sa mga produkto sa silicon nga mapalit sa botika nga walay reseta ug mga indyekson sa doktor sa mga steroids o di kaha mga cream nga ipahid nga nanginahangalan usab og reseta. Ang gusto sa uban kay tangtangon kini pinaagi sa operasyon. Ang problema, mamahimo kini nga motubo og balik ug gani, mas modako pa gayud unya, ilabi na og walay haduol nga pagtamod ug pagdumala sa doktor. Mao nga kung pananglitan, anaa ka niini tungod sa imong mga peklat sa una o di ba kaha nagdagan kini sa inyong pamilya, likayi na lang intawon ang tattoo kay alang kaninyo ug sa inyong mga kaliwatan, bawal ang mangasamad.

Anaa pa gayud ang mga sakit nga makuha diha sa panagsukliay sa mga dugo. Kining mga dagom sa tattoo magkadugo gayud kini. Kung dili ensakto nga pagkalimpyo kining maong mga dagom ug mga lain pang parapernelya, taliwala sa mga paggamit niini, mamahimo nga mapahamyang ka sa mga sakit nga mapakulanap pinaagi sa dugo, susama sa hepatitis B o C, tetanus, ug sa ginakuyawan nga HIV.

Apan, usa kita magpadayon sa unahan, tungod kay taas-taas pa man gihapon ang atong pagahisgutan mahitungod niining imong sitwasiyon, tugoti na usab ako nga ato kini nga padayunon og pagtuki sa mga sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)