Tambagi ko Noy Tikyo: Gamay'g pitoy

DEAR Noy Tikyo,

Tawga lang ko sa ngalan nga Joe. Ang akong suliran bahin sa akong pagkalalaki. Kay hadlok man god kong mabiyaan unya sa babaye nga akong gimahal.

Duna na koy uyab nga almost three years na. Sa tinuod lang, sukad mi nagkarelasyon wala pa gyuy nahitabo namo.

Hinuon, duna man pero kanang kissing ug gakos-gakos lang. Pero bahin sa sex, naningkamot ming malikayan kini mintras nga wala pa makab-ot ang among mga pangandoy sa kinabuhi.

Pulos mi karon graduating sa kursong Education sa usa ka unibersidad sa Davao City. Buot namong matapos ug makakita og trabaho ugma damlag ug mangandam alang sa among kaugmaon kon ugaling kami gyud ang gitakda sa Kahitas-an.

Apan dugay na kong nagproblema bahin sa akong kaugalingon. Nahadlok ko nga kon iyang masayran ang akong sekreto, basin unya og iya kong biyaan sa dayon.

Daghan nang higayon nga itukmod ko sa tentasyon sa paghimo sa buhat sa magtiayon, apan naglikay ko kay di ko gustong masayud siya sa akong sekreto.

Gamay kaayo ko og pitoy, Noy. Di sama nianang ubang lalaki nga dagko kaayo. Mao nga nahadlok ko nga basin og di siya malipay niini ug iya hinuon kong buwagan sa dayon.

Naglibog ko kon unsay angay nakong himuon ning akong kargada karon. Palihug tambagi ko.

Joe

*****

Joe,

Di man kana angay nga ikahadlok ug ikabalaka. Tinuod di kasarangan ang imong problema apan ang gugma di man magbase kon dako o gamay ka niini.

Actually, wala diha ang kalipay sa sex mismo, kon di naa sa foreplaying. Seguro alang kanimo di kaayo ni makahatag nimo og kadasig, apan alang sa mga magtiayon sayud sila niini diha sa kombati sa kama.

Unsaon man nang dako, kon ang lalaki di mahibawong mo-foreplay sa iyang partner, ilabi na kon ang iya lang kaugalingon ang iyang tagbawon sa kama.

Hinuon ang sex usa lang ka aspeto sa kinabuhing minyo. Duna pay mas labaw pa niini.

Ang kaminyuon man god di man lang tungod sa sex. Apan usa ka kahimtang nga wa lang magtutok niini kon di sa kinatibuk-an.

Di man pod ka makagarantiya nga kon dako og kargada, di na biyaan sa asawa. Gamay o dako, way garantiya nga molahutay ang relasyon.

Ang tinuod nga makagarantiya mao ang tinuod ninyong pagmahal. Ug ang pagmahal di lang makita sa sex kon di sa inyong pagtagad sa usag-usa, maayong pagtinagdanay ug magkasinabot.

Kini maoy mohatag og lahutay sa inyong relasyon, di ang sex.

Busa wad-a kanang imong mga kahadlok ug kabalaka sa kaugalingon. Inay paningkamot nga imong mapakita ang imong gugma sa mas bililhon pang butang gawas sa sex.

Sa ako nang giingon ang sex kabahin sa kinabuhing minyo, apan di kini maoy kinatibuk-an sa inyong kaminyuon.

Noy Tikyo