Tambagi ko Noy Tikyo: Nahanaw

DEAR Noy Tikyo,

Ako si Kring, taga Digos City apan nia ko sa Davao City nanarbaho isip katabang.

Duna koy kapuyo kaniadto, apan nikalit na lang man to siya og kawala nga wa ko kahibawo kon asa paingon.

Mao tong nagtuo na lang ko nga iya kong gibiyaan ug gusto nang makigbuwag. Sukad adto, wa na ko maghunahuna pa niya ug naningkamot na lang ko og ako.

Mao tong higayona nga nakaabot ko og Davao City sa pagpangita og trabaho.

Wala pod magdugay, nakasulod dayon og katabang nga maoy nakatabang nako aron nga maka-move on ko sa nahitabo sa akong kinabuhi.

Apan nahibulong na lang ko niadtong miaging semana kay dunay nag-text nako. Sa dihang akong gibasa, ang ako man diay kapuyo nga nangayo og pasaylo ug buot nga makigbalik.

Naa kuno siya sa Butuan kay didto siya nakakaplag og trabaho. Unya moari daw siya diri sa Davao aron nga makigkita nako.

Sa tinuod lang, naglibog ko ning iyang pagbutho og balik. Tinuod duna pa koy gugma niya apan tungod sa iyang gibuhat, nawad-an ko niya og gana.

Hangtud karon sige ko og kadawat og text gikan niya ug naghangyo nga magbalik na mi.

Unsa may akong buhaton? Dawaton ko ba ang iyang hangyo?

Kring

*****

Kring,

Ning higayona, ayaw una og dali-dali sa paghukom. Di igo ang pag-text nimo nga moingon nga mangayo siya og pasaylo ug makigbalik dayon.

Bisan kinsang tawo puwedeng makahimo niini nga di kinasingkasing ang pagpangayo og pasaylo. Ilabi na gyud nga pinaagi lang og text.

Kon matinud-anon siya, kinahanglan nga atubangon siya nimo sa personal ug di lang pinaagi sa text.

Huwata kon tinud-on ba niyang moari siya aron nga makigkita nimo. Unya sutaa una kon unsa ang tinuod nga hitabo sa kalit niyang pagkahanaw ug nganong wala siya makapahibawo nimo niadtong tungura.

Kinahanglan nga mohatag siya og igong katin-awan bahin niini aron nga makaseguro kang sinsero siya sa iyang tinguha nimo.

Dinhi ka na mohatag og desisyon kon maka-explain na siya sa tibuok hinungdan sa hitabo. Kay imo man kanang mailhan o mamatikdan kon nagsulti siya sa tinuod o wala.

Lisud man god nang magdali-dali ka og desisyon nga way himuong lakang kay basin og nagpakaaron-ingnon lang pod siya, ug unya buwagan na sab ka og balik.

Kinahanglan nga kon dawaton nimo siya og balik, pamatud-an niya nga mahal ka niya pinaagi sa pagpakasal nimo, di lang puyo.

Kana maoy dakong hagit para niya. Dinhi nimo masukod kon tinud-anay ba siya pinaagi sa pagbarog sa iyang gugma para nimo.

Noy Tikyo