5 Davraa boxers sa quarterfinals

Marianne L. Saberon-Abalayan

VIGAN, Ilocos Sur -- Lima ka Davao Region Athletic Association (Davraa) boxers ang nagmaya sa kalipay human gipangpildi ang mga kontra ug miabante sa quarterfinals sa pagsugod sa Palarong Pambansa 2018 boxing competition sa Plaza Burgos, Lunes sa gabii.

Sila Lester John Yanis, Reymund Albupera, Myrwen Aballe, Andy Dave Maranan ug Kim Delmar Macaangga makigtigi alang sa bronze medals sa tagsa-tagsa nila ka weight classes karon.

Ang 15-anyos nga si Yanis, gikan sa General Santos apan miapil sa Barangay Una Boxing Team ni Rep. Tonyboy Floirendo sa Panabo City isip iskolar, mipildi sa unang round (usa ka minutos ug 58 segundos) referee-stopped-contest (RSC) nga kadaugan kontra Eugenio Tomas sa Cagayan Valley sa schoolboys pinweight 44-46 kilograms (kgs).

Si Yanis, mikumpleto sa iyang una nga Palaro, mibuhi og solid nga left uppercuts rason nga wa kasugakod si Tomas.

"Walo ko magdahum nga mapildi dayon nako sya. Kaduha man sya naihapan, gidula ko lang man sya. Mura pa syag newbie jud," suma ni Yanis.

Si Yanis, nga maguwang sa upat ka anak nila Jickerez, tricycle driver, ug Jocelyn, canning factory worker, nagsulti: "Sa unang higayon nga naigo nako sya sa panga, lipong na sya pero nisukol man gihapon. Sa ikaduhang higayon, gihunong najud sa referee."

Si Davao City's Albupera, Batang Pinoy Mindanao 2018 gold medalist ug Davraa Meet 2018 best boxer, mipildi ni Guillermo Payas sa Mimaropa Region via unanimous deision, 5-0, sa school boys light flyweight 46-49 kgs.

Si Albupera, nga incoming Grade 11 student sa Marilog National High School, midomina tungod sa mga lig-on niyang kombinasyon.

Ang Dabawenyo nagkanayon: "Naglisod man sad ko kay mu-counter man sya."

Tumong niya nga modaug og bulawan sa Palaro.

Samtang si Aballe mipildi ni Reymark Robles sa CAR sa split decision, 3-2, sa school boys light bantamweight (50-52 kgs) clash, si Maranan mipukan sab ni Jason Sales, 4-1, sa school boys bantamweight ug Macaangga miiskor og kadaugan via second round RSC kontra C. Castro sa Cordillera Administrative Region sa youth boys light welterweight division.

Lima pa ka Davraa boxers ang misaka sa ring Martes sa gabii - sila school boys flyweight Christian Betonio, youth boys light flyweight John Ednoel Prevendido, youth boys flyweight JM Diocares, youth boys bantamweight D.V. Arguelles ug youth boys lightweight Jerald Fabricante.