Davao Eagles nanuhak ug bulawan

Marianne L. Saberon-Abalayan

VIGAN, ILOCOS SUR - Nagsugod na sa pagsikad ang mga pambato sa Davao Region Athletic Association (Davraa) Eagles human kini miangkon og duha ka bulawan ug duha ka platang medalya sa nagpadayong Palarong Pambansa.

Naka-angkon og gold medal sa Elementary girls blitz chess individual si Aliyah Rae Lumangtad.

Nakuha sab ni Lumangtad ug kaubang si Lieane Faith Salajudin ang laing gold medal sa Davraa Elementary girls blitz chess team.

Gibansiwag sab ni Irish Yngayo sa Davao City ang silver medal sa Secondary girls blitz individual.

Ug laing plata gikan Secondary girls blitz team nga gilangkuban ni Yngayo ug Blanche Ellyz Bongato (Davao City).

Gahapon sa buntag, minghoy pa ang mga partisipante sa Davao human wa makakuha og medalya.

Unang milangkat og gold medal ang taga Bicol nga si Leslie Delima sa Palarong Pambansa 2018 athletics competition sa President Elpidio Quirino Stadium.

Si Delima, 13, sa Baoa National High School sa San Juan, Camarines Sur, mioras og 10 minutos ug 6.54 segundos sa secondary girls 3,000-meter run samtang si Camila Tubiano (10.07.07) sa Northern Mindanao ug Grace Tejones (10:52.99) sa Western Visayas miangkon sa plata ug bronse nga medalya.

Ang fan ni Elma Muros mipakita'g aksiyon sa iyang ikatulo ka beses nga pagsalmot sa Palaro, diin igo lamang siyang nakakuha kaniadto sa upat ka plata. Motigi sab siya sa 1,500m, 800m ug 4X400m.

Si Davraa bet Andrea de Guia sa Davao City sa pakighinabi miangkon nga puros maayo ang iyang ka-kompetensiya.

"Nakasabay man ko sa ilang pacing," niya pa, dungan sa pagsulti nga naapsan siya sa final lap nga iyang gikakurat.

Dugang pa nga paningkamutan niyang mapalambo pa ang iyang performance karon sa 1,500m.

Ang coach niyang si Valerio Bulpa nagsulti nga gipangulbaan lang gyud si De Guia.

"Tutok lang, kailangan lang mawala ang kaba. Kumpyansa sa sarili."

Samtang ang laing pambato sa Davao City nga si Mark Anthony Caseñas nabutang sa ikapito nga pwesto sa secondary boys long jump finals nga gidag-an sa 17-anyos nga si Algin Gomez sa Cagayan Valley.

Ang uwahi mitala pg 6.96m nga rekord aron makuha ang bulawan kontra Melm James Oliver sa Mimaropa Region (6.88m) ug Lowell Jay Batobalani (6.75m).

Si Caseñas mirehistro og 6.48m apan pakyas nga maapsan ang iyang Davraa record nga 6.62 meters.

"Wala man ko nakulbaan. Kusog ra jud ang uban," pung sa estudyante sa Calinan National High School.