Alab Pilipinas batok Saigon Heat magharong karong adlawa sa USEP

ANG San Miguel Alab Pilipinas mosulay nga makabawi human makalaban og balik ang Saigon Heat sa Vietnam diin magharong sila sa Asean Basketball League (ABL) nga himuon sa University of Southeastern Philippines (Usep) Gym, alas 6:30 gabii karong adlawa.

Ang ganghaan o gate mag-abli alas 4:30 sa hapon.

Niadtong milabay nga tuig, napakyas ang Alab Pilipinas kontra sa Vietnamese, 62-72, diin nakita sa kapin 2,600 Dabawenyo fans didto sa Davao City Recreation Center (DCRC).

Apan gilauman mas init ang duwa human ang kanhi Ginebra San Miguel Kings import Justin Brownlee motabang sa Alab Pilipinas superstar Bobby Ray Parks Jr. ug tim.

Matud ni Sports Development Division-City Mayors Office (SDD-CMO) office-in-charge Michael Denton Aportadera, sa interbyu sa SunStar Davao, nagtuo siya nga makabawi karon ang Alab.

"I believe that Alab has boosted their confidence, they are recharged and more competitive with its freshly-acquired players and coaching staff," ni Aportadera.

Apan ang SDD-CMO chief, isip host, mas giseguro ang seguridad sa ilang ikatulong higayon nga pag-host sa liga.

"No problem. We already coordinated with the Central 911, Davao City Transportation and Traffic Management Office (CTTMO), Davao City Police Office, Task Force Davao, Davao City's Public Safety and Security Command Center, Police Auxiliary among others," niya pa.

Dugang ni Aportadera nga usa kini ka free-admission event diin dili ginabaligya ang tikets.

"This is for the celebration of the 81st Araw ng Dabaw that's why we will control the giving away of tickets to avoid those who sell it," niya pa.
Anaa sa kapin 8,000 ang ihatag alang sa 8,000-capacity Usep gym.
Malipayon sab si Aportadera human nga mahinayon na gyud ang iskedyul karong adlawa human plano unta kini isibog. (ABM)