Lumapay sa Tagum mihakot og 10 medalya

OROQUIETA CITY, Misamis Occidental -- General Santos City (GenSan) ang nakakuha sa overall human midaug og bulawan sa pencak silat ug taekwondo una nahuman ang Batang Pinoy Mindanao Games.

Kinatibuk-ang 17 ka bulawan ang nasakmit sa GenSan niadtong Biyernes sa nagkadaiyang isports aron manguna nga dunay 44 ka bulawan, 47 ka plata ug 48 ka bronze nga medalya.

Misunod sa GenSan ang Davao City (43-21-16) ug ikatulo ang Davao del Norte (38-27-36).

Samtang, usa ka pambato sa Tagum sa arnis nga si Chelsea Lumapay mihakot og napulo ka medalya sa napulo ka events niya tigian diin dunay siyam ka bulawan ug usa ka bronze.

"I am so happy, nahirapan ako sa traditional pero salamat kinaya ko pa din po," sulti sa 10 anyos kinsa makigtigi sab sa Palarong Pambansa sa Vigan karong Abril.

Gikan siya sa pamilyang Arnis diin iyang maguwang lalaki usa sab ka atleta sa maong isports.

Mao kini ang ikaduhang higayon miapil si Lumapay sa Batang Pinoy nga niadtong milabay nga tuig wala siya midaug.

Samtang sa laing resulta, si Rio Kissel Ungaya, Hannah Seins Leano ug Rica Mae Boholst sa Zamboanga City miuli og tulo ka bulawan sa Pencak Silat Tanding teen girls event Class A, B and C sa maong han-ay samtang si Hazel Mar Padilla sa GenSan ang midomina sa Class E sa parehong event.

Mga midaug maoy abante sa Batang Pinoy National Finals karong umaabot nga Septyembre sa Baguio City. (PR)