Nixon, giilang Mr. Davao 2018

NABULSA ni Pepito Nixon, pambato sa JBC Gym and Fitness Department Family sa Iligan City ang titulo sa Mr. Davao 2018 Mindanao Bodybuilding Challenge sa atrium sa Gaisano Mall, Bajada, Davao City bag-ohay lang.

Ang kompetisyon nga gi-organisa sa United Bodybuilding Association kauban ang Sports Development Division sa City Mayor Office gisalmutan og 40 bodybuilders gikan nagkadaiyang dakbayan ug munisipalidad sa Mindanao.

Ang gobyerno sa Davao City migahin og P162,000 alang sa mga mananaug sa upat ka dibisyon, Bantamweight, lightweight, heavyweight ug physique.

Si Nixon maoy kasamtangang kampeyon sa Mr. Pasay 2017 Bodybuilding and Physique Championship diin nakuha niya ang titulo niadtong Disyembre 3, 2017.

Sa Mr. Davao 2018 battle of Champions, gipildi niya sila Andrew Nogales ug Norberto Maning nga pulos taga-Davao apan kampeyon sa Heavyweight ug Bantam weight sa maong han-ay.

Nakuha ni Nixon ang kinatibuk-ang P25,000 premyo diin P15,000 sa pagdaug sa Lightweight category ug dugang P10,000 sa Overall Champion.

Si SDD-CMO Officer in charge Michael Denton Aportadera miingon gilahi ang duha ka kategorya sa kompetisyon aron mahatagan og tsansa ang mga karaan diin ang masters sa sunod kompetisyon posible himuon sa Kadayawan sa Agosto, "We want to show that those who are into this sports are still able, capable and healthy after the years they were the ones competing on stage." (Seth Delos Reyes/SDD-CMO)