Unang bulawan, gipupo sa DavNor

NAHARBAT sa Davao del Norte Pioneers ang unang bulawang medalya sa unang adlaw sa Davao Region Athletic Association (Davraa) 2018 sa University of Mindanao (UM) Matina Campus pag Lunes, Pebrero 19.

Si Jerbie Daclan, nagpuyo sa Sto. Tomas, mitala og 9.15 metros sa shot put elementary boys finals batok nila Gregorio A. Torres kinsa iyang kauban nga miitsa og 8.12 metros ug ikatulo si Jake Jacob Saga sa Davao Durians, Grade 6 estudyante sa Magallanes Elementary School nga mirekord og 7.82 metros.

Mao kini ang unang higayon nga nakaabot si Daclan sa torneyo diin gikan niadtong 2016 kutob lang siya sa division meet hinungdan ang iyang kadaugan, gihalad niya sa iyang amahan nga mipanaw na, "maka-happy kay ako ang una nakakuha para ni sa akong papa," sulti sa estudyante sa Lunga-og Elementary School ubos sa pagbansay ug suporta sa iyang head coach Rosalina Lacaya ug Assistant Coach Noel Balong.

Samtang ang ika-duhang bulawang medalya, nakuha sa pambato sa Island Garden City of Samal (Igacos) Waves ni Russel Ricaforte sa shot put secondary boys nga milabay og gilay-on 13.16 metros kontra nila Christian Daniel Matadling sa Digos Cobras ug Lorijon Aricos sa Comval Gold nga mitala og 11.61m ug 11.10m sa maong han-ay.