7 Davao boksidor sibog sa semis

PITO ka mga boksidor sa Davao City Durians ang abante sa semifinals sa nagapadayong Davao Region Athletic Association (Davraa) 2018 Boxing Competition didto sa Davao City Recreation Center niadtong Lunes sa hapon.

Giundang sa referee ang dula tali ni Raymund Albupera sa Davao Durian ug Joverk Mongkil sa Davao Occidental sulod sa 37 segundos sa unang round human nga mitalikud si Mongkil tungod di na mopadayon sa pakigsumbagay human nalisa ang iyang wala nga abaga nga naigo sa kusog nga "right straight" ni Albupera.

Una niini, natumba na si Mongkil ug giiphan sa referee dihang iyang gikasugat ang naghaguros nga kumo ni Albupera nga mitugpa sa iyang wala nga apapangig hinungdan sa desisyon nga "Referee Stop the Contest" (RSC).

Gipildi sab ni Emmanuel Canubas si Reigh aedrian Ampler sa Davao del Norte sa Pinweight (44-46) kgs. ug Adrian Kieth Fernandez batok kang Ryan Villegas sa Mati City sa Flyweight (49.1-52 kgs) sa desisyon human sa tulo ka rounds sa ilang pagharong.

Matud ni Coach Jun Sagarino ug Jay Reeve Guerrero nga mas ganado ang mga boksidor sa Davao tungod sakto ang ilang pagbansay sa gitukod Boxing Gym likod sa Almendras Gym.

Ang laing pambato sa Davao nga abante sa semifinals mao sila Eddie Jay Baluyot, John Alvin Gonzales, Chad Andrey Fornes ug Bernardo Balorio Jr. kinsang modepensa og titulo DAVRAA over all-champion nga gikuptan sa dugay na nga katuigan.

Sa laing resulta, gipildi ni Kim Constantino Rigor sa Digos City si Jericho Ligas sa Mati City sa Light Flyweight (46-49 kgs.).

Daug sab si Remark Joshua Jorillo sa Comval kontra kang Aldrin Ardon sa Tagum City sa Pinweight Division.

Kauban nga midaug sila John Lester Yanis sa Panabo City kontra Darrelle Mark Verano sa Mati City, Matthew Tapang sa Digos City Trekkers kontra Dennise Sabsal Jr. sa Davao Occidental, Joshua Solis, Digos City Trekkers vs. Eduardo Teric, Davao del Sur, Carl John Austria vs. Arjie Malintad Tagum City, Jomari Madrid, Comval vs. Jonaire Palbin, Davao Occidental, Almar Rigor, Digos City vs. Hercules Dofiles sa Davao del Sur, John Michael Diocares vs. Jay Frank Calig-onan sa Davao Oriental.